Miss Mizoram 2026 thlang dawn

Miss Mizoram 2026 thlang dawn
Tunhnaiah rampuam huapa nula nalh, zei leh thluak tha thlanna hrang hrangah Mizo nula te thlen chin a sang sawt hle a, state pawn atangin title chhuanawm tak tak an rawn hawn ta fo mai a, hetiang lama tui Mizo nula te leh a buaipuitute an phur thin. Tunah pawh Zonet TV chuan Mizoram Journalist Association thawhpuiin Miss Mizoram 2026 a thlang leh dawn ta a, inbuatsaihna kalpui mek a ni.
Miss Mizoram 2026-a tel duh tan January ni 26, 2026 atangin application form lak chhuah theih a ni dawn a, application form hi ZONET Office-ah lak chhuah theih a ni. Online kaltlangin application form lak theih a ni dawn bawk a, online-a lak theihna tur chu la tihchian leh a ni ang. Application form thehluh theih hun tawp pawh la tihchian leh tur a ni bawk.
Miss Mizoram 2026-a tel tur chuan Mizoram mi leh sa (Mizorama cheng), nula kum 18-30 inkar an nih a ngai a, feet 5 leh inches 5 tala sang an ni tur a ni a, nula hnahkhat (pasal nei tawh ni lo, pasal nei hnai mai tur pawh ni lo) an nih a ngai bawk.
Mizoram chhunga district hrang hrangah ‘District Miss’ pawh thlan leh tum a ni a, District Miss te chu Miss Mizoram final contest-ah an tling nghal dawn a, Aizawl district-a mite tan March ni 4. 2026-ah Open Audition neih tum a ni a, hetah hian Aizawl district mite chauh ni loin, district dang mite tan pawh a tel theih dawn tho a ni.
Hei bakah hian kuminah tlemin kalphung an tidanglam deuh a, Aizawl khawpui chhunga college hrang hrangin college miss atana an thlante chu Miss Mizoramah hian an tel duh a nih chuan direct entry pek an ni dawn a; audition-ah inlan a ngai dawn lo a, eligibility criteria an tlin ve erawh a ngai thung.
Miss Mizoram 2026 Grand Finale neihna hmun tur chu R Dengthuama Hall a ni dawn a, a hun atan April thla tawp lam tinzawn a ni.