Missionary Steins pafa thattu pakhat chhuah

Missionary Steins pafa thattu pakhat chhuah
Kum 1999-a Australian missionary Graham Staines leh a fapa naupang pahnihte thahnaa thiam loh chantir zinga mi, Mahendra Hembram-a chu kum 25 a tan hnuah Nilaini khan Keonjhar jail, Odisha atangin a chhuak.
Tuna kum 50 mi ni tawh, Hembram-a hi a tan chhunga a nungchang that vanga chhuah lailawk a ni.
“Hembram-a hi State Sentence Review Board thutlukna anga chhuah a ni a. Prison directorate chuan Thawhlehni khan hriattirna a dawng a. Kum 25 hnuah a nungchang that vangin dan tlawhchhana chhuah a ni,” tiin Jailer Manaswini Naik-a chuan a sawi.
Jail thuneitute pawhin Hembram-a hi tha taka thlahin a tan chhung zawnga nungchang mawi taka a awm avangin parthi pawh an awrhtir a ni.
Thuneitu pakhat chuan Hembram-a hi a chhuah rualin a tan chhunga hna a thawhnaa a hlawh a dahna bank passbook an hlan nghal tih a sawi.
Hembram leh Rabindra Pal Singh tia hriat, Dara Singh te chu January 21, 1999 khan mipuiin Staines leh a fapate pahnih – Philip (10) leh Timothy (6) te hi a nung chungin an hal hlum a. Mipuite hi Singh-a fuihpawrh nia sawi a ni.
Thite hi Keonjhar district-a Manoharpur khuaa biak in kawta station wagon chhunga an mu lai hal hnan an ni a. He thil thleng hi India bakah ram dang tam tak pawhin a demin thawm a nei lian hle.
Staines-a hian khaw vawta intihlum nan an awmna lirthei chungah hian di a chhek a, hei hi meiin a man kai palh ta nia sawi a ni.
Tlanchhuah an tum chuan tiang nena lo changtu mipuiin an lo dang a, an thih phah ta a. A hnuah an ruhro pawh hmuh a ni.
He thilah hian Singh-a leh Hembram-a telin mi 14 chu titua puh an ni a. Mi 12 erawh thiam chantir niin pahnih hi dam chhung tang tura hrem an ni.
Manoharpur khua, Hembram-a hi kum 1999 khan man niin Singh-a hi January 31, 2000-ah khatih laia Mayurbhanj SP, tuna DGP ni mek, Y B Khurania-a’n a man thung.
Bhubaneswar-a Jharpada Jail-a an tan reng hnuah Hembram-a hi September 22, 2003 khan dam chhung tang tura tih a ni.
Hemi hnuah hian hmun hrang hrang – Jharpada, Jamujhari Open Air Jail (Bhubaneswar), Cuttack, Berhampur, Baripada, Anandpur Sub-Jail-ah tang kualin Keonjhar Jail-ah hian September 28, 2011 atangin a awm tan a ni.
Singh-a hi Khurda-a District & Sessions Court, CBI court atana hman chuan September 22, 2003 khan thi turin a ti a. Kum 2005 khan Orissa High Court chuan dam chhung tang turin a ti leh.
Supreme Court-ah August, 2024 khan khawngaih dilin chhuah a dil a, president hnenah pawh a dil.
March 19, 2025 khan Supreme Court hian Odisha hnenah inchhiara sim leh khawngaih a dilnaah thutlukna siam turin a ti a, ngaihchan mek a ni.