Lokayukta-a thubuai 77 lut atangin 30 bawhzui zel lo

On Apr 19, 2025 54 0

Lokayukta-a thubuai 77 lut
atangin 30 bawhzui zel lo
Mizoram Lokayukta-ah thubuai (complaint) 77 ziahluh a ni tawh a, heng zinga 30 chu zirchian a nih hnu ah chhuizui zel tlak loha ngaih niin tihtawp a ni.
2019 March 11-a din Mizoram Lokayukta-ah hian a din tirh atangin thubuai (complaint) 77 ziahluh a ni a, chhui lailawk (preliminary enquiry) 55 a nei tawh. Heng complaint chhui lailawk atang hian chhui puitlin (investigation) tawh 26 a awm a ni.
Thubuai thehluttute leh eiru nia puhna complaint a zirchianna (examination and hearing) atangin complaint 30 chu titawpin, department thuneitute hnenah departmental proceeding ti tura thupek case 4 a awm bawk.
Tunhnaiah hming awm lo leh thubuai thehluttute biakpawh theih loh complaint a awm thin tih Mizoram Lokayukta hotute chuan sawiin, thu zawh belh ngai leh complaint kal zel dan hriattir turin bawhzui zel a harsa thin tih a sawi. Complaint-ah hian thubuai thehluttu (complainant) in a hming leh biakpawh theihna (contact number leh address) chiang taka ziak thin tura chahin, thubuai thehluttu in a hming leh nihna thup a duh a nih pawhin a hming leh nihna thupsak tur a ni tih a sawi.
Mizoram Lokayukta a eirukna thubuai thehluh hi lehkha pheka ziakin Mizoram Lokayukta office-ah pisa kai hun chhungin thehluh theih reng a nih bakah email hmangin mizoramlokayukta@gmail.com emaw mizoram.lokayukta@mizoram.gov.in ah complaint thehluh theih a ni tih an sawi bawk.
Tun dinhmunah Mizoram Lokayukta-ah hian Lalmalsawma, IAS (Rtd) chu chairperson niin, member pahnih an awm a, full body-in hna a thawk mek. Thawktu 28 awmin a tih changtlun zawknan thawktu dang lak belh tura hmalak bakah hnuchhuitu hran (Inquiry Wing) nei tura buaipui mek a ni.