Mitmu tipawng tui thei ber

Mitmu tipawng tui thei ber
Uruguay pa pakhat chuan thiam thil dangdai zet mai a nei a, a mitmu a tipawng chhuak vak thei a, Guinness World Records-in khawvela mitmu tipawng thui thei berah a puang.
A hming chu Williams Martin Sanchez Lopez a ni a, Montevideo, Uruguay khawchhuak niin, tunah chuan Milan, Italy a khawsa tawh. Williams chuan hetianga mitmu tihpawng vak vak hi mipa naupang kum 8 mi vel lek a nih lai atanga a thiam tawh niin a sawi a, a mit bawr vela tihrawl te a tizawi thiam a, chu chuan a mitmu hi cartoon character ang maiin a tipawng vak vak thei ta thin a ni.
Williams chuan, “Ka naupan lai atanga ka thiam tawh a ni a. Ka mit chung leh hnuai lam tihrawl te ka tiche thei a, ka inzir deuh hnuah phei chuan ka mitmu ka tichhuak thei ta a ni,” a ti.
Williams hian a mitmu a tihpawn nasat lai takin doctor-in a pawn nasat dan teh sakin 0.74 inches a tichhuak thei a, khawvel mipa zinga mitmu tichhuak nasa thei berah GWR-in a puang ta a ni.