Mizo App: Taxi hmangtute chhiah pekna tur?

Tun hnai khan MPCC spokesperson chuan, “Taxi hmangtute’n chhiah an pekna tur atana Mizo App hi siam a ni…Mipuite hi rawk dan chikima min rawk an tum…” tiin sawrkar chu taxi hmangtute atanga chhiah lak tum angin a sawi a.
Hei hi sawrkarin a sawifiah a tul ta niin a lang, a chhan chu, Mizo App siam a nih chhanah mipui atanga chhiah lakna tur tih thu tarlan a ni lova, chhiah lakna tur a nih chuan langtlang taka mipui hrilh hriat hi sawrkar mawh a ni a, a ruk a rala mipui hnena chhiah khawn chu thil tih mi a ni lo.
Mizo App chungchang sawitu hi Mizorama political party lian leh hlun tak hruaitu, political party thupuangtu a nih avangin a thusawi hi mimal thusawi a ni satliah lova, party thuchhuak leh party ngaihdan a ni. A kaihhnawih pawh hi a theuneu lova, state pakhat mipui ‘chhiah’ chungchang a ni.
Kan hriat angin mipui laka chhiah khawn a nih dawn chuan rorelna in sang berah langtlang takin mipui aiawhten an rel ho thin. Tuna tuialhthei atanga chhiah lak tur chungchang pawh Assembly House-ah ngun taka sawi ho leh rel ho a ni a, tuialhthei atanga chhiah tlingkhawm hman tangkai dan tur ‘kawngpui siam nan’ tihte pawh sawi lawk vek a ni a, thil dangah hman a thiang lo; chu chu mipuiin an hmu a, an hre vek a ni. Hei vang hian opposition party te pawhin, ‘chhiah tlingkhawm pawisa a awm chungin enga tinge kawngpui a la chhiat reng?’ tih lam hawiin sawrkar te pawh an kar/nawr thin a nih hi.
Taxi hmangtute atanga chhiah lak tum angin political party pakhat chuan sawrkar a puh a, mipui atanga chhiah lak chungchang hi political party-in mipui hnena a puanzar miau avangin ngaih thutak tur a ni a, a sawi chhuaktu pawh partu thupuangtu a ni a, mêna thlak liam mai chi a ni lo.
Tuna Mizo App hi, sawrkar aproved rate anga dik taka taxi hman man mipuiin an pek theihna tura ruahman nia sawi a ni a, taxi leh taxi hmangtute inkar thil chauh tura ngaih a nih laia sawrkarin chhiah lak a lo tum ve a nih chuan, taxi fare hi ennawna tihdanglam a ngai dawn tihna a ni awm e. Mizo App registration fee erawh Rs 500 lak tum a ni a, hei hi mipui nena inkaihhnawih lo, taxi leh sawrkar inkar ni maiin a lang. Hei hi sawrkar lam hian eng tin nge a rawn sawi fiah dawn? Chu chu mipuiin an ngaihchan mek chu niin a lang.