Mizo H/S ah ‘Thul 2023’

Govt Mizo High School chuan an zirlaiten thiamthil chi hrang hrang entira an phochhuahna – ‘Thul 2023’ chu Thawhlehni khan an school compound-ah an buatsaih.
A hawngtu School Education minister Lalchhandama Ralte chuan zirlaite thiamthil phochhuahna buatsaih a ni chu lawmawm a tih thu a sawi a. Mizote chu talent nei tha tak kan ni, tiin, national level skill competition-ah pawh Mizoramin lawmman pathum a la a, India hmarchhak huap inelnaah phei chuan sawm chuang kan la thei a, tunah khawvel huap skill competition-a tel tumin sawrkarin hma a la mek tih a sawi a ni.
NEP 2020-in zirna pangngai leh skill development a kaikawp a, hemi mil hian zirna kalpui dan tur ruahmanin, school bag ah loh ni te pawh siam a ni tih Lalchhandama Ralte hian a sawi. “Ram changkang ho hi skill-ah an sang a, Pathianin talent a pek te peipunga pho chhuak tura an beihna a ropui thei hle. Zirlaite thiamna pho chhuah hian eizawnna tlaka thiamna nei turin a puih zel ka beisei a ni,” a ti.
Minister hian an school website – www.mizohighschool.edu.in a hawn bakah Thul Exhibition-a zirlaite thu leh hla ziah tarlanna – ‘Ink on paper’ tih chu a tlangzarh a ni.