Mizo hnam dam khawchhuahna atan mistiri hna thiam pawimawh – LESDE minister
Mizo hnam dam khawchhuahna
atan mistiri hna thiam pawimawh
– LESDE minister
Hnamdang mistiri-ten min rawn luhchilh zel lohna atan, Mizo hnam dam khawchhuahna atan mistiri hna thiam a, kan kut thiamna hmanga tan kan lo khawh a pawimawh tih Labour minister Lalnghinglova Hmar chuan a sawi.
Mizoram Mistiri Association (MMA) chuan Thawhlehni khan Aizawlah general assembly vawi 11-na an hmang a. Hmanpuitu Labour, Employment, Skill Development & Emtrepreneurship minister Lalnghinglova Hmar chuan, eizawnna hrang hrang zingah mistiri chu hna zahawm tak a ni, tiin, “Mizo hnam dam khawchhuahna atan a hlu a, hnamdang mistiri-ten hna thawkin min rawn luhchilh a, chutah chuan keini’n kan kut thiamna hmangin tan kan lo khawh a pawimawh a, hnam tan thahnem kan ngaih a pawimawh hle,” a ti.
Mizoram Building & Other Construction Workers Welfare Board (MBOCWWB) chu kuthnathawktute ta a ni a, a hamthatna awm thei pawh tihpun a ni tih a sawi a. Kuthnathawktu zawng zawngin he hamthatna awm hi dawng thei se an duh a. MMA member-te pawh anmahni bakah an hnuaia thawkte thlengin inziaklut vek turin a sawm tih a sawi a ni.
MMA-ah hian tunah member 3000 vel an awm a. Mizoramah branch 115 inziaklut tawhin, kumin atan branch 50 velin zawm thar an tum tih sawi a ni.