Mizo lemziak phochhuak

Mizo lemziak phochhuak
Mizoram Artists’ Development Society (MADS) buatsaih Mizo lemziakmite kutchhuak phochhuahna, MADS Annual Art Exhibition 2024 chu Directorate of I&PR Lianchhiari Run Art Gallery-ah I&PR director C Lalnunkima chuan Thawhlehni khan a hawng. MADS-in Painting Competition 2024 category thuma an buatsaiha tithate hnenah lawmman sem nghal a ni.
I&PR director chuan Mizo lemziakmite kutchhuak phochhuah leh tih lar chu duh angin mipui hnenah a la thleng zau tawk lo nia a ngaih thu a sawi a. Lemziakmite chu hemi kawngah hian tan la tura fuihin, chu’ngah chuan department-in a theih ang angin a puih tur thu a sawi a ni.
MADS Annual Art Exhibition-ah hian MADS member 51 kutchhuak 102 phochhuah a ni a. Acrylic painting 75, water colour painting 15, charcoal /pencil sketch 9, oil color 1 leh sculpture 2 a ni. Exhibition hian tunkar chhung a awh dawn. Painting exhibition theme-ah hian ‘Mizo thil’ tih hman niin open, high school leh middle school category-ah inelna siam a ni.
MADS-ah hian member puitling 99 leh associate member 7 an awm mek.