Mizo nu hnenah Padma Award
India rama civil mite chawimawina sang Padma award, kumina dawng tura thlanchhuah mi 55 hnenah April 5 tlai khan President Droupadi Murmu chuan Rashtrapati Bhavan-ah a hlan. Padma award dawngtu zingah Mizo hnam zai lama hriat hlawh leh thawhhlawk KC Runremsangi (59) a tel.
Mizo zinga arts huang atanga Padma Shri dawng hmasa ber KC Runremsangi w/o Lalthanmawia, Bawngkawn South hi kum 2017 khan folk music lama a thawhhlawk avangin India President kalchhuak Ram Nath Kovind hnen atangin ‘Sangeet Natak Akademi Award’ a lo dawng tawh a ni.
Zaithiam KC Runremsangi hi 1963 March 1 khan Keitum khuaah a piang a, audio album 8 a tichhuak tawh. Art & Culture department-ah dance instructress a ni a, hnam zai leh lam lamah a thawhhlawk avangin Padma Shri dawng tura thlan a nih thu kumin January 25 khan puan a ni.
Padma Shri a dawn chhan tur tarlan zingah hian rimawi hmanga Mizo folk heritage tihausatu leh humhimtu a nih thu tarlan a ni. ‘Queen of Mizo Folk Song’ tia hming pek a ni.
Padma Shri dawng tur hi rawttu an awm a ngai a, KC Runremsangi hi Mizoram sawrkara Art & Culture department-in a rawt nia thu dawn a ni.
Kuminah hian Padma award zinga sang ber Padma Vibhushan chu mi 3-in an dawng a, mi 5-in Padma Bhushan dawngin, mi 47-in Padma Shri an dawng a ni.
Mizo nu hnenah Padma Award
Get real time updates directly on you device, subscribe now.
Prev Post
Next Post