Mizo nulate harsatna sawrkarin a ngaihven

Arab rama Mizo nula, housemaid atana thawn thlakten harsatna an tawh chinfel sak turin Mizoram sawrkarin hma a la reng a, chief minister leh Home minister pawhin an vil zui reng tih sawi a ni.
Mizoram Police thuchhuak chuan, Mizo thalai ramdanga housemaid-a thawk tur mi pathum E&K Agency Vaivakawn-in 2022 November 6-a Syria-a a thawn thlakten harsatna an tawh chungchanga Mizoram sawrkar hma la tawk lo anga sawi chu thu belhchian dawl lo a ni tih a sawi a. Syria-a Indian Embassy Head of Chancery first secretary biakpawh a ni a, official e-mail leh telephone hmanga inbiakpawh reng niin, chanchin update pawh inhriattir tawn zel a ni, tih a sawi.
Syria-a Mizo housemaid-te nen pawh inbepawp rengin, harsatna an tawh dan zawhfiah an ni a. Sawrkar anga hma lak mek a nih thu hriattir an ni a. Syria-a Indian Embassy chuan Ministry of Foreign Affairs (MoFA) Syria nen kumin May 19 khan meeting an nei a, Mizo housemaid chhawrtute hi legal notice pek an ni tawh tih a sawi bawk.
‘A tirah Syrian agency-ten Mizo housemaid-te rang taka an haw theih nan US dollar 2500 theuh chawi tura an tih laiin, Indian Embassy leh Syrian sawrkar thuneitute hmalakna avangin placement agency-te hian pawisa chawi ngai loin Mizo housemaid-te thawhna hmuna thawk turin an aiawh tur an zawnsak dawn a. Indian Embassy atanga thudawn danin, Dubai-a placement agency leh Syria-a placement agency-te pawhin Mizo housemaid-te thlaktu tur (replacement) an buaipui mek a, Syria ram dan anga thil tih tul ang tih fel a nih hnuah exit visa pek an nih tur thu an sawi,’ a ti.
Syria chu rambuai tak a nih avangin official-a thil bawhzui a harsa a. Chutih rualin, Mizo housemaid-te an lo haw theih nan tih tur tul ang ang tih zawh thuak tawh a ni tih Mizoram Police hian sawiin, ‘Mizoram khua leh tui, ram danga hnathawkte harsatna tawh chungchang hi Mizoram chief minister leh Home minister-ten an ngai thutakin heng case hi uluk taka vil reng a ni,’ a ti. Dubai-a harsatna tawk Mizo hmeichhe pakhat pawh chief minister leh Home minister-te kaihhruaina in kumin May 9 khan him takin Mizoramah hruai haw a ni tawh tih a sawi bawk.
Mizoram sawrkar chuan uluk takin he thil hi a chhuizuiin a ngaihven zui zel dawn tih a sawi a. Heng Mizo hmeichhia harsatna tawkte hi a rang thei ang bera Mizorama hruai haw an nih theih nan hma a la zel tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More