Mizo nulaten pasala Mizo neih hi hnam humhalhna – CYMA president

Mizo nulaten pasala Mizo neih hi
hnam humhalhna – CYMA president
Mizo nulaten pasala Mizo an neih chu hnam humhalhna atan a pawimawh hle tih Central YMA president R Lalngheta chuan a sawi.
YMA Buarpui Branch chuan an kum 50 tlin, Golden Jubilee chu Thawhtanni khan an lawm a. He hun hmanpuitu Central YMA president chuan ram leh hnam humhalh chungchangah Mizo nulaten Mizo pasal neih chu kan hnam humhalhna’na pawimawh tak a ni tiin, “Mizo ngei pasala neiha fa thahnem zawk neih hi kan hnam tan a pawimawh. Hnamdang pasala kan neih chhan hi kan hmangaih vang pawh a niloa, sum leh pai kan duh vang niin a lang. Hnamdang pasala kan neih hian Mizo hnam kan phatsan a ni tih hre thar ang u,” a ti.
Khawvel hmun hrang hranga Zofate inpumkhata kan awm theihna’n Central YMA chuan hma a la a. Kumin April 18 hian Lungleiah Mara Thalai Pawl leh Central Young Lai Association te nen hnam inpumkhat chungchang sawiho turin an inhmukhawm dawn tih R Lalngheta hian sawiin, “Hei hian Zofate inpumkhatna kawngah hmasawnna min thlen ngei ka ring. Mizoram hi Zofa zawng zawngte inpui a ni a, kan unauten harsatna leh buaina an tawh changin an lo tlankhawm thin a, kan lo tuamhlawm thin. Kan unaute hi nasa lehzuala kan tuamhlawm zel pawh a ngai,”a ti.
Mizo hnam nun kalsual tur ven a ngai a, aia upa zah pawh kan inzirtir thar leh a pawimawh tih Central YMA hruaitu hian a sawi a. Tunlai thangtharah Zonun zemawi kan kalsan tial tial nia a lan thu sawiin, hei hi kan hnam tan a tha lo hle tih a sawi.
Sum leh pai thianghim loa hausak chak thutna Mizoah a awm mek a, hausa thut pawh an awm mek tih a sawi bawk. “Hausa thut ho hian kan in leh lo an ti to mek a, mi harsa tan in hmun lei ngaihna a awm tawh lo. Hei hian mirethei leh hausa inkar a tizau a, kan hnam tan a pawi hle a ni,”a ti.