Mizo nurse-te an duh bik – Larsap

Mizo nurse-te an duh bik – Larsap
Larsap Hari Babu Kambhampati chuan India ram hmun tam takah Mizo nurse-te chu hnathawk turin an duh bik thin tih a sawi a. Mizo thalaite healthcare lama an hmingthatna chhuanawm a tih thu a sawi.
Regional Institute of Paramedical and Nursing Sciences (RIPANS) tihlen tumna atana hnathawh mek leh thlen chin sawipuiin larsap hian Nilaini khan Raj Bhavan-ah RIPANS director leh contractor-te a kawm a. RIPANS hi India rama nursing, pharmacy leh paramedical sciences hmunkhata zirna kalpuina awmchhun leh Ministry of Health & Family Welfare-in a enkawl awmchhun a ni.
Larsap chuan RIPANS Aizawla zirtirtute leh office staff-te inpekna azarah Mizoramah nursing, pharmacy leh paramedical sciences zirna tha tak a awm a ni tiin, hei hi Mizoram tan mai ni lo hmarchhak state 8-te tana malsawmna a ni tih a sawi. RIPANS atanga zirchhuak tawh atanga chhuta zaa 93 in hna tha tak an hmu thei chu hlawhtlinna ropui tak a ni tih sawiin, RIPANS atanga zirlaiten an zirchhuah hma hauh pawha hna an hmuh theihna’n campus interview tam zawka buatsaih dan zawng tur leh hospital lian deuh leh company lian deuhte hriatah RIPANS chu hmelhriattir tum turin an hotute chu thurawn a pe a ni.
India ramah nasa takin healthcare professional-te mamawhna a pung mek a – sawrkar hnuaiah, hospital leh healthcare facility hrang hrang hnuaiah leh damdawi siamtu company lian tak takah te hnathawh tur a awm tih a sawi a. India ram hmun tam takah Mizo nurse-te an duh bik thin tih a sawi.
Contractor-te chu an intiamkamna bawhchhe loa a hun pangngai chhung emaw a hma in emaw hna an thawk zo thei tur chu lawmawm a tih thu larsap hian a sawi a. RIPANS chhunga building-te sak zawk a nih chuan India hmarchhaka College of Nursing, Pharmacy and Paramedical Sciences tha ber atangin India rama zirna in tha bik zingah RIPANS chu a inhlangkai thei dawn niin a sawi. RIPANS-a khum 100 awmna hospital pawh mipui tan a tangkai dawn hle tih a sawi bawk.
RIPANS Aizawl hi kum 1995- 1996 khan North Eastern Council (NEC) hnuaiah din a ni a. 2007 April 1 khan Ministry of Health & Family Welfare-in a enkawl tan a ni. Tunah hian nursing (BSc,MSc), medical laboratory technology (BSc, MSc), radio imaging technology (BSc), pharmacy (B.Pharm, M.Pharm & Ph.D in Pharmacy) leh optometry (B.Opt) ah zirtirna a kalpui mek a. Kumtin course hrang hrang belhkhawma seat awm zat chu 259 niin, tunah hian semester hrang hrang belhkhawma zirlai awm zat chu 812 an ni. Tun thlenga RIPANS atanga zirchhuak tawh zat chu 3291 an ni a, heng zinga zaa 93 hian hnathawh tur an hmu vek a ni. RIPANS atanga zirchhuakte hi sawrkar, damdawi in, company leh a dangah hna an thawk a. Rampawn – USA, Australia, Canada, Ireland, England, Norway, Singapore, UAE leh Denmark ah te RIPANS atanga zirchhuak mi tam takin hna an thawk mek bawk.
Ministry of H&FW chuan fund cheng vaibelchhe 350.59 hmangin RIPANS tihchangtlun hna a thawk mek a. Building, thawktu lak tur leh a thuamna bungruate hi peihfel a nih chuan kum khata zirlai lakluh theih zat chu a letin a pung dawn a ni. He hna thawh mek hi kumin December-a zawh beisei a ni a. Project component zinga pakhat – khum 100 awmna hospital erawh mamawhna a san avangin Union Health minister Dr Mansukh Manviya chuan kumin August ralhmaa zo turin hriattirna a rawn pe tawh. Tunhnaiah Ministry of H& FW chuan RIPANS hotute chu khum 50 awm theihna Critical Care Hospital (khum 100-a la tih len theih tur) atan project siam turin thurawn a rawn pe a ni.