Mizo pa lar Dr HL Malsawma, officer lian a nihna leh thil danga hriat hlawh chu Ningani khan a boral a, lumenpui a nih hnuah Zirtawpni hian Tuikhuahtlanga an chenna inah vuiliam a ni ang.
-- Advertisement --
Dr HL Malsawma hi a hun hnuhnung lamah a chak lo a, chuap lam natna a neih bakah insawiselna neuh neuh a neih avangin tun hnaiah damdawi in pawh a lut fo. In lama enkawl a nih laiin, Ningani chawhnu lam dar 2:45 khan a chawl ta a ni.
1939-a Tlangpui khuaa piang niin, he khuaah hian middle school a zo a, chumi hnuah Reiek-ah awmin, 1974-ah R Laltlaii nen an innei a,a fa pasarih, tu 16 leh tuchhuan 10 an nei.
St.Edmunds College, Shillong-ah BA Hons (Politcal Science) a zo a, Gauhati University atangin MA Politcal Science with Social Anthropology and Sociology ) zo lehin, Pune University-ah one year Linguistic course a zo leh a, journalism lamah pawh one year course a zo. 1981-ah Gauhati University atangin Ph.D a zo a, a thesis chu ‘Sociology of the Mizo Society’ a ni.
Pachhunga University College-a a thawh hnuah Lunglei Govt College-ah a thawk a, chumi hnuah Lunglei leh Aizawlah DEO niin, higher & technical education department directorate-ah awmin, director-in a pension a ni.
Sorkarah committee pawimawhah a tel fo a, pawl hrang hrangah a inhmang bawk. Kohhran mi niin Mission Veng Kohhran leh chuta tanga indang Tuikhuahtlang Kohhranah te chanvo pawimawh tak tak a chang thin.
Inkhawmpui leh puipunna hmunah usher hna leh thingpui sem hnaah te mi tangkai leh remhria a ni a, Gospel Centenary lawm laia minute 15 chhunga mi sing chuang hnena thingpui sem pawh, a tih dan kha Dr HL-a duan a ni. Hetiang thilah hian hmun hrang hrangah zirtir turin an sawm thin.
Pa titi thiam a ni a, hlimawm deuha thil sawi thiam niin, amah la hmu lote pawhin a titi atang hian amah an hriat phah ang tih tur khawp a ni. Khawvel a chhuahsan ni pawh hian a titite chu social media lamah a darh chak hle.
Zirna ngaisang a ni a, ‘Thiamna ka neih chuan ka thi a nih ngawt loh chuan tuman ka thiamna min laksak lo ang,’ a ti thin. ‘Lehkhabu ziaktu hi mihring an nih chuan ka thiam ve thei ang,’ tiin thahnemngai takin lehkha a zir thin.