India rama medical college-te pawmtu ber National Medical Commission chuan Zoram Medical College chu a pawmpui institution ni turin duhkhawp lohna lai ala nei nia sawi a ni.
-- Advertisement --
The Aizawl Post thudawn danin National Medical Commission (Medical Council of India thlaktu) endiktute chu kumin January thla tir lam khan Zoram Medical College endikna kal mek chhunzawmin Mizoramah an rawn kal a, ZMC chu medical college rintlaka pawm turin an tehna zingah a zirtirtu (faculty) lam bakah staff nurse leh demonstrator lamah te duhkhawp lohna ala awm a, infrastructure lamah chuan pawm theiha ngaih a ni tawh tih sawi a ni.
ZMC faculty tur hi duhthusam anga tha hmuh vek a harsa tih sawi thin a ni a. ZMC enkawl hna chu Society hnuaia awm a nih tawh avangin NMC guidelines zulzui tho siin faculty lak dan leh lak theih chin a siam danglam ve thei a, chumi hmang chuan faculty pawh hi, a awmsa leh lak theih turte an tlin tawk (qualify) theih nan ruahmanna siam theih a ni tih thudawnna chuan a sawi.
Hengte hi chinfel a nih chuan medical college rintlak leh puitlinga pawm mai theih a nih a beiseiawm tawh thudawnna chuan a sawi a. 2018 August-a MBBS batch hmasa ber chuan kumin April vel hian exam an hmachhawn anga, kum khat internship an neih zui tur nen, kum 2024 velah an zirchhuak thei dawn a, hemi hma hian full recognition nei tur hian tih tur tul tihfel hman ngei tura ngaih a ni tih sawi a ni.
Chief minister Zoramthanga hoin NMC-in ZMC a rawn endikna chungchang hi Ningani khan thlirlet a ni a. H&FW minister Dr R. Lalthangliana, H&F Welfare Board vice chairman Dr ZR Thiamsanga, H&FW secretary Lalramnghaka, official dangte leh ZMC hotute an tel. NMC endikna leh ZMC-a thawktu indaihlohna awm thenkhatte sawihoin, indaihlohna phuhruk tura hmalak dan tur te an sawi a ni.