Mizo piputen arsi leh van thengreng chanchin an hriat leh zir dan bihchianna, Mizoram University-a Department of Physics leh Mizoram Science Centre, Directorate of Science & Technology tangdunin international symposium an buatsaih chu Ningani khan MZU hmunah neih a ni.
He hun hmanpuitu MZU chief rector, larsap Dr Hari Babu Kambhampati chuan van thengreng chanchin hian mihringte nunah hmun lairil tak an luah a, hmakhawsang atang tawhin khawvel hmun hrang hranga chengten an hnam mil ang zelin arsi thawnthu an nei a. Van pakhat hnuaia cheng kan nih angin arsi chungchanga kan thil hriat zirna leh chhinchhiahna bakah thawnthu a ngaihnawmin a bengvar thlak thin hle tih a sawi. Hnam ziarang nen inzawm tlat thil hlui ngaihhlutna tlakhniam zel avangin, a vawnthat kawngah thangtharten hma lak reng a ngai tih a sawi bawk.
“Digital media leh internet hmangin thil thar chi hrang hrangin thangtharte an nun a deng mek a, hetihlai hian mahni hnambil ziarang leh pawmdan vawnthata hlanchhawn a nih zel theihna turin upa zawkte leh zirtirtuten mawh an phur a, tan an lak a ngai,” a ti.
Larsap chuan mizo piputen arsi an lo hriat dan vawnhim a nih theihna’na hma latu MZU Physics department leh Science Centre te fakin, Science Centre chu thangtharte hnenah arsi chanchin leh van thengreng chanchin zir chakna tuh tum zel turin a chah.
Symposium-ah hian Tasmania Australia-a Hive Planetarium principal astronomer, International Planetarium Society-a chair of International Development ni bawk Dr Martin George chu keynote speaker atan hman a ni.
Ni hnih awh tur he symposium-ah hian Mizoram chhung leh pawn atangin mithiam thlanbikten technical session vawi li neiin, thupui zir leh sawiho a ni a. Vawiin, Zirtawpni hian Mizoram Science Centre Berawtlangah chhunzawm a ni ang.
Mizo pipute van thengreng chanchin zir dan sawikhawm
Get real time updates directly on you device, subscribe now.
Prev Post
Next Post