Mizo tawng humhalh kawngah All India Radio-in thawh hlawk – K Sapdanga

All India Radio Aizawl chu Mizo tawng humhalh kawnga thawh hlawk ber zing ami a ni tih minister K Sapdanga chuan a sawi.
All India Radio Aizawl din champha vawi 60-na, Diamond Jubilee chu Zirtawpni khan anmahni hmun Tuikhuahtlangah hman a ni a. Hmanpuitu Home minister K Sapdanga chuan, Mizo tawng humhalh kawnga thawh hlawk ber zing ami, tawng hman dik chungchangah thangtharte kaihruaitu pawimawh tak a ni tih sawiin, “AIR Aizawl hi Mizo hnam zia leh tawng vawnhim kawngah tangkai takin hna a thawk thin a, Mizo hnam nun vawnghimtu pawimawh tak a ni,” a ti.
Khawvel hmasawn zelah All India Radio chu hnam zia humhalhtu pakhat niin, tunkai khawvel changkanna nena inherremin mipui tan a la ding reng tih a sawi a. Tunlai khawvel midang inngaihsak tawnna a tlem zel lain, AIR Aizawl chu lungngai leh khawhar hnemtu pawimawh tak a ni a, programme an duan hrang hrang chu hmun kilkhawr thlenga ngaihthlak a nih avangin a tha zawnga mipui kaihruai theitu pawimawh tak a ni tih a sawi a ni.
All India Radio-in kum 90 a tlin ruala AIR Aizawl-in kum 60-na a lawm thei chu hun intawng fuh tak a ni tih K Sapdanga hian a sawi a. Radio chu tun thlengin Mizo mipui thinlungah hmun pawimawh a la chang reng a, thudik leh rintlak an hriat theihna, min awmtleitu leh thangthar tam tak chherchhuaktu a ni, tiin, tun thlengin ram pumah AIR artist chu zaithiamten an hlut tih a sawi bawk.
AIR director leh Mizoram Cluster head DR Lalropuia chuan, All India Radio Aizawl bultan dan a sawi a. Radio chu thuthar puanchhuahna ringawt niloin Mizoram hmasawnna tura thawktu, sawrkar leh mipui thlunzawmtu tangkai a ni, tiin, “AIR Aizawl hi mipuiin thuthar an hriat theihnan leh him tlan zawk theihnan rambuai hunlaia din a ni a. Mipui thinlungah a hlutna a la ngai reng,” a ti a. Tunlai khawvel hmasawn zel rualin AIR-in hma a sawn theihnan thawktute theihtawp chhuah turin a chah.
All India Radio Aizawl Station hi 1966 July 31-a din a ni a, tunah hian thawktu 300 chuang an awm a ni.