Mizo tlangvalin thirsakawrin state tin tlawh chhuak

Motor pawhin India ram state tin tlawh chhuah hi mi tam zawk tan chuan tum mi a ni lo ang a, thlawhna pawhin a peihawm loh ang. Vanlallawmzuala Varte chuan thirsakawrin a fang chhuak. UT a tlawh tel nual bawk.
October ni 22 tlaiah khan Kohima atangin Manipur-a Mao khua a thleng a, ti hian state a tlawh kim chiah. Mao a thlen hian km 16350 vel a tlan a, Mao atang hian Kohima-ah letin, chuta tang chuan Aizawl thleng tlan leh a tum. Aizawl a thlen chuan km 17026.93 thirsakawrin a tlan dawn tihna a ni.
“Ka lawm khawp mai, ka tum ka hlen a, lawm tak ka ni,” a ti a, “Ka chau ve thin tho, chau lo han tih tur chu ka ni lo,” a ti bawk.
LZ-a tia koh Vanlallawmzuala Varte, Mission Veng hian January ni 25 khan Aizawl a chhuahsan a, ni 272 a thang bo tawh. Ni 272-ah hian ni 192 chu thirsakawr a khalh a, chu chu darkar 1215 vel a ni.
Boruak a thianghlim theih nana mipuite koh eih tumin, ‘ride to clean air’ tih thupui aupuiin state hrang hrang leh UT thenkhat hi a tlawh a, Mizoram State Pollution Control Board te sponsor niin, Central Pollution Control Board kaihhruaiin state tinah pollution control board te’n an lo buaipui a ni.
2009-a adventure lama inhmang tan LZ-a hian environment chungchang hi a vei thu a sawi a, “Mite angin tangkaina dang kan nei ve lo a, thil han siam chhuah te pawh kan thiam ve lo a. Thirsakawr hi ka hmanrua a ni tiin, kan chenna khawvelin boruak thianghlim a neih theih nana thirsakawr hmanga theihtawp chhuah ve hi ka tum a ni,” a ti.
A tum angin state tin a tlawh thei a, UT thenkhat a tlawh bawk. Hengah hian a thupui hi a theih ang angin a sawi a, pollution control board hotute nena an inkawm thin bakah sikulah te, hmun remchang dangah te thu a sawi thin. Media lamin an lo kawm thin bawk.
“Boruak thianghlim kan mamawhzia sawina hun remchang ka nei a, miin ka kalnaah beisei phak bakin an lo ngaihven a, chuvangin hlawhtling ve chuan ka inhria,” a ti.
Ruah sur hnuaia a tlan a, vur tlakna hmunah a tlan bawk. Ni sa vawl vawl hnuaiah pawh a tlan nasa. Dam loh tum te pawh a nei a, zan thimah a tlan fo bawk. Khawpui lianah lirthei tawt tak tak karah a tlan nasa a, an sut thuak thuak chang te pawh a awm. UP-ah phei chuan bike-in a su. A thirsakawr a chhiat tlat chang a awm bawk. India rama hmun hniam ber Kuttanad leh khawvela lirthei thlenna hmun dang ber Umling La te a tlawh bawk.
“Khaw lum kha hrehawm ka ti ber,” a ti a, Rajasthan, Gujarat leh Madhya Pradesh-ah te khua a lum zual. 50 degree Celsius velah a inrap tauh tauh thin. “Khua a lum em em a, thirsakawr ka khalh avangin a lum zual a, ka tihngaihna hre lo hian ‘Lalpa, a va sa tak!’ ka ti tawp zela,” tiin hemi chungchang hi a sawi.
Vawi khat mah a inchhir lo a, mahse nin chang a nei. “Ka inchhir ngai miah lo a, mahse nin chang chu ka nei. A lum thei ropui mai si a, phaiah khaw thlir tur a awm bawk si lo a, a ninawm duh khawp mai,” a ti.
A beisei phak bakin miin an lo lawmin an lo dawngsawng tha tih a sawi a, “Thirsakawra hetiang tlan hi an lo ngaisang em em mai a. Hindi thiam miah lo ka nia, mahse ka thirsakawr hmangin ka insawi kaw thei. Thirsakawr an hmuh chuan min en dan a dang zel,” a ti.
Thirsakawra hetianga tlan hi a beisei phak bakin an lo ngaisang a, amah hmutute’n hmelhriat hleih loh hnenah pawisa te an pe ringawt zel!
“Rs 100 te, Rs 500 te, Rs 1000 te, an neih remchan ang kha min pe ringawt zel a, chanchinbumite pawhin min kawm zawhah pawisa hi min pe ringawt zel,” a ti. Tirunelveli leh Kanyakumari inkara a tlan lai pawhin nufa pakhat hian an lo tiding a, Rs 2500 an pe ringawt. Naupangin an pawisa neih chhun pek an tum chang pawh a awm. Kawng lakah chhang an lo pek chang te pawh a awm.
“State hrang hrangah kan Mizopuite’n min lo dawngsawng a, min lo mikhual a, an chungah ka lawm em em a. Hei hi mak ka ti lo a, Mizo inhmangaih tawnna a ni a. Hnam dangin khati taka min lo ngaihsak kha chu mak ka ti a, khatiang khawpa thisakawr khalh an lo lawm kha mak ka ti a, ka thirsakawr a chhiat pawhin min siampui ringawt zel a,” a ti. Mipa naupang pakhatin Rs 100 pek a tum a, a la duh ta lo tih te pawh a sawi.
Hlawk a intihna pakhat chu, Mizoram chungchang sawina hun a nei thin kha a ni. Chanchinbumite nen an inkawm fo a, mipui hmaah a ding fo bawk. Mizoram awmna hre lote an lo ni nawk a, chungah chuan Mizoram awmna te, a chanchin te a sawi thin.
“Mizoram chanchin puanna hun remchang ka nei kha ka lawm. Google map hmang te’n ka hrilhfiah a, a nuam ve khawp mai,” a ti.