Mizoram-ah India lamthiam rual fuan khawm dawn

Mizo Dance Camp leh Mizoram State Sports Council tangkawpin an buatsaih Mizoram Dance Sports & Movement Championship chu July ni 27-30 hian neih a ni dawn a, he event-ah hian ram pum huapa lamthiam rual Mizoramah an rawn fuankhawm dawn a, intihsiakna hrang hrang awmin, dance battle bikah phei chuan Indian top dancer te endik tur leh showcase nei turin an rawn tel dawn a, Crew Battle-ah hmarchhak state hrang hrang aiawhin crew an tel dawn bawk a ni.
Mizoram Dance Sports & Movement Championship-ah hian Showdown Dance Battle, Jump Rope Championship, Aerobics Championship leh Hei Raw Dance Competition te a awm dawn a, lawmman sem chhuah tur zawng zawng hi Rs 3,00,000 a ni.
Showdown Dance Battle
Showdown Dance Battle atana main event hi Breaking a ni a. Breaking hi Olympic Sports a lakluh tawh a ni a, a endik turin Bboy Flying Machine a lo kal dawn a, ani hi India a number one ni lai leh Olympics-ah pawh India aiawh tura hmatheh zinga mi a ni. Hei bakah hian Hip Hop Dance Battle-ah Tanuj a chu Judge turin a lokal dawn a, he Mumbai tlangval hian India aiawhin International-ah pawh sang tak a lo thleng tawh a ni. Rep Your Style battle chu Srilakshmi, Gujarat lamthiamin a rawn endik ve thung dawn a. India a hmeichhe street dancer-ah chuan a berte zinga mi a ni. An pathum hian Crew vs Crew battle an endik nghal dawn bawk a ni.
Jump Rope
Jump Rope Freestyle Male leh Female Open Category buatsaih tel a ni dawn a, Samuel Liansanga chu Judge tur niin, kum bithliah awm lovin jump rope thiam te tan duh ang tawka in-show theihna hun siam a ni dawn a. Mipa leh hmeichhe category a thenin, lawmman hi siam a ni.
Aerobics
Mizorama kan la neih ngai loh, aerobics championship buatsaih tel a ni dawn a. Group leh solo category te siamin, hetah hian aerobics set, mahni theihna leh thiamna, flexibility, athletics leh creativity show-na hun a ni dawn a. Gymnastic acrobatic leh fitness aerobics te pawh a leng vek dawn a. Group-ah hian member 4-8 inkar tel theih niin, solo-ah hian kum bithliah awm lovin a duh apiang tan a tel theih thung. Endik tur hian Mizorama kan aerobics & fitness instructor neih that ber te zinga mi Nutei Pautu, Esther Chhakchhuak leh Misty Hruaii te an thu dawn a ni.
Hei Raw Dance Competition
Group dance competition buatsaih a ni bawk dawn a, crew te, college dance clubs leh school dance team te tan tel theih a ni a. Member 4 – 10 inkar tel theih niin, Round 3 a awm dawn a. Round hmasa ber hi Online Video Round niin, semi final leh final round a awm leh dawn a. Judge tur zingah hian Alan Rinawma, MDC Founder & Creative Director pawh a tel a ni.
MDC Showcase
June ni 30 hian Dawrpui Multipurpose Hall-ah heng intihsiakna zawng zawng final round leh Mizo Dance Camp Showcase neih a ni dawn a. MDC Team ten lam hmuhnawm tak tak an entir bakah MDC zirlai ten performance an nei dawn a, he performance atan hian Summer Intensive buatsaih a ni dawn a, June ni 1 hian class ?an a ni ang.