SMOKING AREA

By Mahmuaka Chhakchhuak

Smoking Area tih chu ‘Meizial zuk phalna hmun’ tihna a ni mai nain tu pawh mai hian a Sap tawng zawk hi kan hmang uar ta tlat mai si a nih hi. JF. Laldailova khan Thuziak reng reng chu thupuia Sap tawng hman hi midang mit a la bikin a chhung thu pawh chhiar a chakawm bik tih lam hawia a ziak ka chhiar tawh a, chuvangin tun tumah pawh hian Mei zuk phalna hmun ti loin Smoking Area han tih mai chu a lo awlsam deuh zawk bawk nen ka han hmang ve mai teh ang.
Amah pawh ka hriat chiah loh, Pu K. Thanhlira hian Thu leh Hla (April 2023) ah hian kum 27 hnua Lunglei Zin Thu tih thupuia hmangin Article ngaihnawm deuh mai a ziak a. A ziak ngaihnawm thiamin ka chhiar tui ta riau mai a, Lunglei Salem Veng BCM Biak Ina Inneihna an hman thu sawiin chutah chuan Biak In bathlara Smoking Area a awm thu leh thil chhinchhiah tlak tak a nih thu sawi telin Biak In compound chhunga zuk leh hmuam khirh taka khap a, compound pawn chiaha meizial zuk leh sup sup ai chuan mei zu mite tana ruahmanna fel tak siam hi a tha zawk awm a sin tiin a sawi nghal bawk a. Helai thu ka chhiar chu a ziaktu thinlung ang hial zu pu phak ve dawn dawnin ka inhria a, lawmawm ka tiin Salem BCM Kohhrante chu remhria ka ti hle mai. A hmun ngeia va hmuh ka chak tak riau avangin ka inbuatsaih nghal bawk a, minute rei lo teah ka thleng phei thuai a, Salem BCM Biak In luhna gate chu alo inhawn sa bawk avang chuan midang melh kual zak zak pah hian ka lut a, ka han hawi kual velin khawilai hmunah hian nge Smoking Area chu a awm ang aw tiin ka zawng a, ka hmuh tak mai loh avang chuan Biak In enkawltute chenna hmun (Quarter) lamah kalin ka zawt a. Pa ber erawh a lo awm lo a, an nu chuan min hruaiin Mipa inthiarna kal pelh a, rem taka Smoking Area an lo buatsaihna hmun chu min hruai a, chumi hmunah chuan Zial bung paih khawmna tur (Ashtray), khuhhriang thal zawng ang deuh hian pahnih hi an lo dah bawk a.
Chu hmun chu kawngka pakhat neia luh leh chhuah mai tur a niin pawn boruak thawveng tak chu a nih mai nghal bawk avang chuan Salem BCM Kohhran hruaitute hian hetiang tur reng hian an ngaihtuah nghal nge ni ang a, a remchan avanga ruahman chawp ni ang tihte ka ngaihtuahnaah a rawn awm nghal a. Engpawhchu nisela Kohhran chinchang hre tak leh tunlai mil ang zela ruahmanna siam thiam tak an ni tih chu phat rual a ni lo a, fakawm ka tiin entawn tlak tak an niin ka hria. Smoking Area hi a dung lam 10Fts vel niin a vang lam chu 5Fts vel emaw chauh a ni nain a hrana va pan ngai a nih ang ngei hian midang tana mei zial rim a hriat mai theih pawhin a rinawm loh mai bakah a bihruk deuh bawk avang chuan an ngaihtuah tha hlein a hriat a ni. Kohhran dangte hian hetianga mei zutute tana hmun bik hi ruahmanna an nei ve ang em tia ka han zawh kual chuan Lunglei Salem BCM Kohhran anga ruahmanna nei tak hi chu an lo awm lo ni awm tak a ni a, anni Kohhrante hi a hmasa ber an nih loh pawhin a hmasate zinga chhiar tel ngei ngei tur an ni thei ngei ang.
Durtlang Hospital-ah hian Zun In hrulah Smoking Zone an siam bawk a, thutna hmun awm bawkin thawveng tak hian a awm a. Pindang hran pawh a awm chuang loin tualzawl sir mai chu a nih avangin tu tan pawh a hmuh theih vek tho a, rim erawh a hriat phak kher awm loh e. Sorkar Department lamte hi chuan hetianga an ruahman hi ka hre chiah lo a, ka hre kim lo pawh a ni mai thei e. Ram dang leh hmun dangahte chuan Smoking Area/Zone hi an lo ngai pawimawh hle mai a, Kolkatta Airport-ah ngei pawh khuan ground floor kil khatah darthlalang veka pindan siamin a chhungah chuan mei zuk theih an ti a, kawngka bul maiah hian Cigarette chi hrang hrangin an zuar nghal bawk a ni. Chutiang chuan midang tana hnawksak lo turin ruahmanna an siam mai a, a tha viau mai. New Zealand ram phei chuan kum 2025-ah chuan an ram chu Mei zuk awm lohna ram ni tura buatsaihin sorkar leh mipui an tang hle a, The Smoke free Environment and Regulated Products (Smoked Tobacco) Ammendment Bill pawh an pass tawh nghe nghe a, chutiang chu keini ram angah chuan Vana rah ang a ni rih si.
New Zealand ram ang bawk hian ram dangte pawhin Zuk leh hmuam lamah hian nasa takin hma an lo la hlawm tawh a, Bhutan hian kum 2004 atang khan an ram pumpuiah zuk leh hmuam an khap hmiah a, khawvela ram pum huapa zuk leh hmuam khap hmasa ber an ni. Vaihlo lam chi zawrh leh hralh chu dan bawhchhiatna tiin khauh takin an la kalpui mek a. Anni ang bawkin Ireland pawhin kum 2004 atang khan khapin Europe ramah chuan a hmasa ber an ni nghe nghe. US hian kum rei tak kal tawh atang khan mipui zinga zuk leh hmuam tih a lo khap tawhin Restaurant, Bar leh hnathawhna hmunahte mei zuk a lo khap tawh a. Chu mai ni loin Vaihlo lam chi reng reng pawh a zawrh leh hralh dan turah dan mumal tak an siam bawk a ni. Anni ang bawk hian Canada ram pawhin mipui zinga mei zuk a khapna hi a rei tawh a, Vaihlo lam chi hralhna turin hmun bik an ruahman bawk a ni. Australia ram chuan dan khauh tak nen mipui zinga mei zuk hi a khapin a zawrh leh hralhna lamah pawh dan khauh tak an nei bawk.
Hetiang hian khap hi tha tiin duh hle mah ila tun dinhmunah chuan kan la inkhap theih a rinawm lem loh. Amaherawh chu tun aia nasa zawka khuahkhirhna erawh chu kan siam a ngai hle mai. Vaihlo lam chiin mihring taksa a tihchhiat dan leh Zuk leh hmuam avanga Mizorama nunna chan kum tina kan awm chhoh zel dante ngaihtuah chuan Sorkar leh mipuite hian tanrualna tha tak nena kan do a ngai a, chumi tur chuan ruahmanna kan neih a ngai bawk a ni. A that loh dan leh Cancer natna hlauhawm tak neih theihna a ni tihte pawh a hre lo tak tak hi chu mi tlemte chauh an niin a rinawm zawk a. Chuti chunga hrilhnawn fo kan la ngaih tho bawk si avang hian zuk leh hmuam tihna hmun (Smoking Area) hi tun aia uar zawka kan siam mai a ngaiin a lang. Lunglei Salem BCM Kohhrante ang hian Kohhran dang zawng zawng hian Smoking Area nei thei vek ila, Sorkar Office zawng zawng hian nei thei bawkin Restaurant leh Mipui punkhawmna hmun zawng zawngahte pawh hian siam zelin uar taka hmalakna neih ni sela, khawlai leh mipui punkhawmna hmunah hian meizial zu khu luih luih hi hmuh tur a tlemin kan vantlang hmun hi a lo hrisel zawkin a hahdamthlak zawk pawh a rinawm.