Mizoram buh thar lei chungchang

Mizoram State Government Paddy & Rice Procurement Committee chu nimin khan chief minister hovin an thukhawm a. Hmalakna kal mek, Mamit leh Kolasib district atanga loneitute thar chhuah buhhum lei a, Om Om Modern Rice Mill, Pangbalkawn, Kolasib district hmanga her a lo rel tawh chu sawiho leh a ni. Mizoram sawrkar hian Buhhum hi kg khat Rs. 30 zelin Rice Mill hmunah a lei a, hei hi sawrkar laipui leina (Minimum support price) aiin a tha zawk hle nia tarlan a ni.
Kum 6 kal ta, February 14, 2019-ah khan Agro Farmers Society, Bilkhawthlir hnuaia kuthnathawk inziak lutte buh thar quintal 23 chu Mizoram sawrkarin a vawikhatna atan Bilkhawthlir khuaah a lei a. Kha kha Mizoram history-ah Mizoram sawrkarin awmze nei deuh zawka kuthnathawktute buh tharchhuah a lei vawikhatna a ni a. Khami tum khan FCI rate angin buhfai quintal 1 cheng 2750-in lei a ni a, Bilkhawthlir khuaa retailer pakhat huam chhunga awm chhung tin ten Kg 3 theuh an la thei dawn niin sawrkar thuchhuah chuan a tarlang nghe nghe a nih kha.
Ei leh bara intodelh tumin sawrkar awm tawh zawng zawngte khan kawng hrang hrangin hma chu an la vek a, mahse awmzia a nei thui tak tak thei lo. Chutih laiin buh kan ching tlut tlut a, thlai kan ching reng bawk a, engemaw chen chu kan tharchhuak ve a, kan mamawh tam zawk chu state pawn atangin kan chawlut reng a. Thlai leh thei pawh state dang atangin kan la lut reng na a, engemawzat kan tharchhuah hian min chhawk viau. Buhfai erawh, tharchhuak ve reng tho siin, FCI atanga buhfai kan lei tur quota beng hniam zawnga kalpui theihna khawpin ruahmanna a awm ngai lo.
Tunah hian Mamit leh Kolasib district chu tinzawn deuh bik a han ni phawt a. He district pahnih huam chhunga buh thar chhuah hian FCI atanga buhfai quota hi eng zat nge a tlakhniamtir dawn tih chu kan thlir mek tur a ni leh ta. PDS hnuaia ration buhfai kan kalpui thin dan her danglam a nih avangin kum khat chhungin buhfai quintal 46,000 zet hum a nih thu budget speech-ah kan ngaithla tawh a. Tuna Mizoram tharchhuah buhhum lei tur hian state pawn atanga lo lut tur buhfai engzat nge a lo nawr let theih dawn tih pawh hriat chakawm tak a ni leh ta.