By Mahmuaka Chhakchhuak
-- Advertisement --
Jan. 8 – 11, 2023 chhung khan 71 Lodhi Estate, Delhi-ah Capacity Building Workshop – XII chu hman a niin India ram hmun hrang hrang atanga INTACH Chapter atangin mi 54 kalkhawmin North East atang hian mi pathumte pawh kalin Meghalaya atangin pakhat leh Mizoram atangin Pu Lalram Thanga IFS (Rtd) nen kan pathuma kalin tluang tak leh hlawhtling taka hun hman a ni.
He Workshop-a tel turte hi Pathianni (Jan. 8) chawhnu dar khat atanga inziah luh tur a nih avangin tlai ai chuan hma a tha zawk e tiin Jan. 7, 2023 (Inrinni) ah khan Lengpui Airport atanga Delhi pan a niin Inrinni zanah hian Kishangard lamah thiante Inah riak hmasain a tuk, Pathianni chawhnuah chuan a hun tak thleng turin in report-na tur hmun Residency Resorts Pvt. Ltd. USI Premises, Shankar Vihar lam chu pan leh a ni a, tluang taka thlengin 3 Star Hotel nuam takah kan zavai chuan min thlenkhawm tir a, ruahmanna fel tak neiin a huho zela thil tih a ni. Mizoram atanga ka telpui Pu Lalram Thanga erawh Pathianniah Lengpui atanga Delhi rawn pan thungin zan dar riat velah a rawn thleng a, room khatah kan awmin a thlamuanthlak hle. Kan riah khawmna kiang lawka Building pakhat chu Ei leh In lam buatsaihna hmun a ni bawkin chutah chuan zing leh zanah kan inhnawhpuar thin a, keini ho pawh chu min lo dawngsawng tha hlein ei leh in tur hi chi hrang hrang thahnemtham tak hi an chhawp reng a, mahnia duh duh lak mai a ni thin.
State hrang hrang atanga kalkhawm kan ni bawk a, kan incheina a danglam hlawmin kan hmel pawh a inang lo hlawm hle; a thenin khabe hmul sei tak takin an zuah a, a then maksak tak takin an inchei bawk a, hmun dang atanga rawn kalte hi kum upa lam an ni tlangpui bawk. State dang atang hian Hmeichhia an kal uar viau mai a, a zahve dawn lai chu hmeichhia an ni awm e. Ei leh in lamah pawh hian kan tihdan a danglam viau bawk a, a then chuan an chawm hluah a, kutin an bar hawng hawng a, a thenin ei tam hlau hmel takin an ei hlek hlek a, hnam hrang hrang kalkhawmte khati taka ni li chhung vel kan han cheng ho chu a nuam hle mai a, kan haw darh dawnah meuh chuan kan inngaina hman viau tawh hlawm bawk a ni. A bik takin South Indian lam hi fiamthu an duh deuhin a hriat a, kalkhawmna hmun reng rengah a bengchheng pawl an ni ziah a, Bus chhungah pawh an ri le lu thei zel mai bawk.
Delhi khawpui hi a lo vawt hle mai a, Jacket kan hakthuah mai bakah Kekawr pawh kan hakthuahin lum takin kan inthuam reng a, room-ah erawh heater a awm avangin nuam takin kan awm thei thung. Kan thlennaah hian room tinah Thingpui in lum chawpna tur (Hot Pot) a awm vekin Bawnghnute, Coffee, Thingpuife leh Chini pack te hi engemawzat a awm bawkin Tuithianghlim hi bottle thum vel a awm reng bawk. Residency Resorts atang hian Workshop kan neihna hmun,71 Lodhi Estate hi Bus pahnih hmanga kal a ni thin a, darkar khat vel lai kal a niin a hla ang reng viau a, a hmun erawh a nuam hle. Zing lam dar 9:30 atanga tlai lam dar 5:00 thleng hi hun awl nei loin zirtirna kan ngaithla char char a, a kar lakah vawi hnih emaw hi thingpui in chawlh neiin chu bak chu hun awl kan nei lo reng reng a, zan lamah pawh homework kan neih thin bawk avangin thawveng taka boruak hipna hun a awm meuh chuang lo a, thiante nen pawh hian inkawmna hun a awm meuh ngai lo.
NI KHATNA: Jan. 9, 2023
Zing lam dar 9:30 ah Programme hi tan a niin INTACH Multipurpose Hall, 71 Lodhi Estate Building-ah hun hman a ni a, hun hmasa ber a ni bawkin Chairman INTACH, Maj. Gen. LK. Gupta, AVSM (Rtd) chuan inlawmna thu a sawi a, chumi hnuah Dr. Chuden Misra IAS (Rtd), member Secretary INTACH hnen atangin inlawmna thu hi ngaihthlak leh a ni. A hnuah chuan Power point Presentation hmangin thusawi ngaihthlak a ni a, Dr. Parul Munjal, Director, INTACH Heritage Academy, New Delhi chuan What is Heritage? Tih thupuia hmangin zirtirna a pe a, a bengvarthlakin a hlawkthlak hle a ni.
Dar 11:00 AM ah chhun thingpui in chawlh neiin chumi zawhah INTACH Hqtr lamin thil hlu tak tak an kawlte chu thlirin kan kal kual leh a, kum tam tak ami tawh thil hlu tak takte kan thlirin mit a tlai hle. Lehkhabu remkhawmna lamah kal lehin Lehkhabu chi hrang hrang an neihte chu mit tla dawn dawnin kan thlir leh a, chumi hnuah Multipurpose Hall lamah lutkhawm lehin Conservation of Architectural Heritage tih thupui hmangin Mr. Divay Gupta, Principal Director, INTACH Architectural Heritage Division, New Delhi chuan zirtirna a nei leh a, anmahni an tuiin an zirtirnaah an inpe bawk a, ngaihthlak a manhla thin hle a ni. Hemi hnuah hian Identification and Listing of Heritage tih thupui hmangin Ms. A Vijaya, Director, Listing Cell, INTACH Architectural Heritage Division, New Delhi hnen atangin zirtirna ngaihthlak leh a ni a, chumi hnuah chuan Lodhi Garden lamah kalin kan zavai chuan kan chhuak ho ta a.
Lodhi Garden-ah hian Historical Site pawimawh tak mai awmin a hming chu Shish Gumbad a ni. He In ropui leh hlu tak mai hi kum 1489 – 1517 inkar chhunga sak niin vawiin thlengin tha takin ala ding a, chu chu keini chuan a hming hmasa, tuna a hming, a awmna hmun Latitude leh Longitude, Approach, Property type, Date of Construction, Ownership Property Use leh Significance tih zawng zawng hriat tumin kan va belchiang a. Google Map atangin engemaw chen hriat theih dan turte min hrilh bawk a, kan hlawk viau mai. Kei phei chuan a innghahna bulthut chu eng tiat chiah nge tih hriatna turin ka han hlam chhin a, hlam sawm bial niin feet 60 vel zet bial a ni tihna ni turah ka ngai a, heti taka vawiin thlenga tha taka an la humhalh theih dante hi ropui kan ti hle a ni. Tichuan, duh aia rei mah kan awmin Bus-in min nghah reng tawh thu min rawn hrilh takah chuan hmanhmawh ang reng takin kan let leh sawk sawk a, Bus-ah lutin Residency Resorts lamah chuan kan tlan leh vang vang a.
Zan lamah hian homework min pein Lodhi Garden kan kalna chanchin kha naktuka midang zirtir thei tur khawpa lo inbuatsaih turin min ti hlawm a, dar sawm pakhat thlengin kan inbuatsaih hlawm a.
NI HNIHNA: Jan. 10, 2023
Zing dar 7:30 atanga 8:30 chhunga breakfast a ei theih avangin insiam sain Dinning Hall lamah kan phei a, chumi hnuah chuan Bus-in 71 Lodhi Estate lam panin kan tlan leh vang vang a, dar 9:30 AM ah zirlai tan lehnghalin nilengin kan inkhung a. A hmasa ber atan An introduction of INTACH Chapter Guidelines tih thupuia hmangin Gp. Capt. Arvind Shukla, Director, INTACH Chapters Division, New Delhi chuan Power Point hmangin fiah takin min zirtir leh a, chumi zawhah chuan zan lama kan inbuatsaihna angin group paliah min thenin kan han sawiho nak nak a. Power Point hmanga midang hrilh turin kan inbuatsaih hlawm a.
Chumi hnuah Creating Heritage Awarness for Children – Catch them young tih thupuia hmangin Ms. Purnima Datt, Principal Director, Heritage Education and Communication Services, New Delhi chuan min zirtir leh a, a subject-ah a tui bawkin a hmel hmuh a nuam em em bawk avang chuan kan ngaithla uluk hlawm viau pawhin a hriat. Chhun thingpui in chawlh neih leh a niin chumi hnuah chuan Conservation of Art and Material Heritage tih thupui hmangin leh Conserving our Community Craft, Natural Heritage and Bio-Diversity tih leh Safeguarding Intangible Cultural Heritage tih thupuia hmangtein zirtirna kan ngaithla leh a, a manhla thei thin hle a ni.
Hetianga zirtirna kan ngaihthlak char char hnuah hian keimahni lam atangin hun hmang vein inbuatsaihna kan lo neih tawhte chu Power Point hmangin midang hnenah sawifiahna kan han nei hlawm a. Kan tui tlang hlawm bawk a, hunin min daih ngang lo a, tlai thim thlengin hun kan hmangin kan tui hlawm hle a ni.
NI THUMNA: Jan. 11, 2023
Hemi niah ve thung chuan zirtirna ngaihthlak a ni tawh loin keimahni (participants) lamin hun kan hmang tawh zawk a, sawi tur kan ngah hlawm hle mai a, a thenin rawtna thu lam an sawi bawk a, hmun hrang hrang leh ram hrang hranga hnam rohlu kan neihte humhalh dan tur leh enkawl zui dan turte sawihona neih a ni bawk a, a hlawkthlak hle a ni. Hemi hnuah hian INTACH Hqtr lam atangin thu pawimawh hrang hrang ngaihthlak leh a niin chumi hnuah Certificate semna hun hman a ni a, tlai lam dar 4 velah inngai tak chungin kan inthendarh a, a then chu mahni awmna hmun lamah Rel-in an hawng nghal a, mi 20 vel chauh chu Residency Resort lamah letin zanah khawhar takin hun kan hmang a.
A tuk zing, breakfast ei zawha kei pawh chu hmun chu thawmhnaw nen chhuahsanin Kishangard lamah ka phei ta a. Pu Rta chu Zirtawpniah Mizoram lama hawng nghalin kei chu Patna lamah la kualin Jan. 25, 2023-ah khan Aizawl ka thleng ve chauh a ni.