February ni 16-ah Tripura an inthlang dawn a, hetah hian Mizoram chhuahsantu Tuikuk te’n vote an thlak dawn tih thu dawn a ni.
-- Advertisement --
“Heta roll-a awm tawh hi an awm nual a, vote an thlak theih nan hmalak a ni,” Mizoram Bru Displced People’s Forum (MBDPF) general secretart Bruno Msha chuan a sawi.
Mizoram chhuahsantu Tuikuk-te hi Tripura hmar lam relief camp parukah an awm a, Mizorama kir lova Tripura-a awm hlen tura tih niin, Tripura roll-ah pawh thun mek an ni. Roll-ah hian an la awm kim lo na a, Tripura state inthlanah hian vote an thlak dawn a ni.
Bruno chuan Tripura roll-ah hian mi sing bawr an awm tawh tih a sawi a, a hlawma an awmna chu constituency pali a nih thu leh Kanchanpur bial chu a tam berna a nih thu te a sawi. Kanchanpur bialah hian voter 4000 vel an awm thu a sawi a ni.
“MLA bial pali velah chuan deciding factor kan ni ve ang, a bikin Kanchanpur bialah,” a ti a, political party-te pawh an mite hnenah hian an campaign tih a sawi.
Chutih rual chuan vote tur inhrilh a awm lo tih a sawi a, “Chu mite chu vote tur tih ang chi kha, chutiang chu kan ti lo ang. Voter te’n an duh ber an vote ang,” a ti. “Party tan bik neih a dik lo a, mawi pawh a mawi lo a,” a ti bawk.
MBDPF hi relief camp-a an awm laia an inthlunkhawmna a ni a, sorkar nena an inbiak pawha an aiawhtu an ni. Bruno chuan MBDPF hruaitute hi political party te’n an dawr a, an vote an duh tih a sawi a, mahse an mite hi vote tur tih hrilh an tum lo tih a sawi.
Tripura roll-a awm tawhte hi Mizoram roll-a awm thin an ni vek lo tih a sawi a, Tripura-a an chhuk hnua vote nei, Mizorama vote nei hman lo an thahnem tih a sawi.