Thawhlehni khan Assembly Budget Session an tan a, a tan ni-ah hian larsap-in sorkar hmalakna hrang hrang sawiin, SEDP hnuaiah tanpuina sem mek a nih thu te, ramri-ah ram humhalh nan theihtawp chhuah a nih thu te a sawi.
-- Advertisement --
House address-na hun hmangin larsap Hari Babu Kambhampati chuan Socio Economic-Development Programme (SEDP) hnuaiah Phase-I kalpui mek a nih thu, first installment-ah chhungkaw 60,000 hnenah Rs 25,000 theuh pek a nih tawh thu te, hetah hian cheng vaibelchhe 150 sen a nih tawh thu a sawi.
Second installment tur buaipui mek a nih thu a sawi a, beneficiary-te’n Rs 25,000 theuh an dawn leh tur thu leh Phase-I hi March thlaa zawh fel tum a nih thu a sawi.
Sericulture department-ah SEDP hnuaiah chhungkaw 300 thlan chhuah an nih thu leh 2022-ah silk MT 68.241 tharchhuah a nih thu a sawi a, muga, mulberry leh Eri sector-ah 2022-23 chhungin 16.833 lakhs tharchhuah a nih thu a sawi.
Chhungkaw 1261 hnenah SEDP hnuaiah sanghadil tanpuina pek a nih thu te, sangha chi pawh nuai 22.40 sem a nih thu te a sawi a, chhungkaw 828 hnenah street vending, home composting, street sweeping leh waste collection-ah te SEDP hnuaiah tanpuina pek a nih thu a sawi.
District tin atanga thlan chhungkaw 4616 te hnenah horticulture trade atan tanpuina Rs 25,000 theuh pek a nih thu a sawi a, tomato, zikhlum leh dawnfawh lamah te hmasawnna a nasat thu sawiin, Tualte khuain tomato atangin cheng vaibelchhe 2 chuang an lei thu te, zikhlum hmun siamtute’n Ryozeki Cabbage atangin cheng vaibelchhe 3.70 lei chhuah a nih thu te, dawnfawh thartute tharchhuah zat chu MT 950 ni tura chhut a nih thu leh cheng vaibelchhe 3.80 hmuh a nih thu te a sawi.
Kum liam ta 2022-ah khan dragon fruit chingtute’n MT 312 an thar a, cheng vaibelchhe 6.24 an thar tih te, lakhuihthei lamah tanlak a nih thu, MT 29023 thar a nih thu leh UAE leh Qatar-ah te thawnchhuah a nih thu te a sawi.
Ramri-a ram humhalhna chungchang a sawi a, Mizoram leh Assam inrina velah police-te awmna tur cheng nuai 327.56 senga sak a nih thu a sawi.
State dang nena inrina hmun hrang hrangah SEDP sumin in engemaw zat sak a nih thu a sawi a, sum sen zat hi cheng nuai 495.41 ni tura chhut a nih thu te, Assam nena inrina vela security camp hrang hrangah SEDP sum cheng nuai 96.50 hmangin water supply scheme siam a nih thu te a sawi.
Larsap Hari Babu Kambhampati hian sorkarin agriculture a ngaih pawimawh thu a sawi a, Champhai, Mamit, Serchhip, Kolasib, Khawzawl leh Saitual district-ahte Fostering Climate Resilient Upland Farming System in the North East (FOCUS) Project kalpui a nih thu, he project hian khaw 300 a tuam thu te, chhungkaw 55,000, mi 322,500 a tuam thu te a sawi.
Zirna lamah high school-ah science leh mathematics te chu English leh Mizo tawngin 2013-24 atanga zir theih tura hmalak a nih thu a sawi a, high school leh higher secondary school-ah mit khaw hmu lote tan Braille textbook leh textbook a ziak hraw te buatsaih mek a nih thu a sawi.
Rural development lama sorkar hna a sawi a, Aibawl Cluster chu ram pumah SPMRM Rurban hnuaia project thawk zo hmasa ber a nih thu a sawi.
Infiamna lamah Lengpui, C |huamluaia Mual leh Chawngte-ah te phul lem phah a nih tawh thu a sawi a, Kawrthahah leh Tuidam-ah te tun hnaiah phul lem phah hi hawn a nih thu te a sawi. Khelo India Youth Games 2022, National Games 2022 and the North- East Olympic Games 2022 tea Mizoram team-te chibai a buk a, Mizoram atanga a hmasa ber ni turin Jeremy Lalrinnunga’n Commonwealth Games-ah gold medal a lak thu leh Ainawn Vengah inhmun pek a nih thu te, hockey-ah Lalremsiami a tel thu leh bronze medal a lak thu te a sawi.