By Vansanglura Vanchhawng
Thuhmahruai:
Zirna pawimawhzia hi inhrilh ngai lovin kan hre chiang hle awm e. Zirna tha leh zirna in tha hi thil inzawm tlat a ni tih pawh kan bel tlang hle hlawm ang. Mizote hi sap missionary-ten lehkha min lo zirtir kha a lawmawmzia ka ngaihtuah fo thin. Sap missionary-te khan lehkha min lo zirtir lo sela eng nge tunah hian kan dinhmun ni ang tih hi ngaihtuah thiam pawh a ni lo. Zirna avanga Mizoram hmasawn nasatzia leh kan rilru ngaihtuahna changkanzia hi hnam dang zinga hna ka thawh hnu hian kawng tam takah ka hmu chiang lehzual.
Kan missionary-te khan Pathian thu leh khawvel zirna (theological and secular education) tha tak min lo hnutchhiah hi kan lo vannei ngawt mai. Zirna kalphung (education system) changkang leh tunlai tak min lo pe a ni tih he thu ka ziah lai hian ka ngaihtuah chhuak chauh va. Kan rama zirna chhawm nun leh tihchangtlun zel hi kan mawhphurhna a ni. Kan neih mek kan tihchangtlun zel karah hian hma kan sawnna tur pawimawh tak chu University neih belh hi a ni. Chu lam chu kan thlurbing dawn a ni.
Ram Leh Hnam Hmasawn Nan Kan Mamawh:
Mizoramah hian zirna kan uar viau a, hma pawh kan sawn ve thawkhat viau a. A lawmawm hle. Chutih ruala kan ngaihtuah tel tur chu zirna tha (quality education) kan pe chhuak em tih te, zirna tha pe chhuak turin zirna lama hmasawnna kan ngaihtuah em tih te hi a ni. State dang leh ram dang ruala ke kan pen ve theihna turin uluk taka ngaihtuahna kan hman tak tak a hun ta hle. Heti taka zirna kan uar chung pawha zirna in pui/in sang (university) pakhat chauh kan la nei si te hian kan rilruah zawhna a siam ngai em?
Mizoram University hi kum 2001 khan kan nei a, a lawmawm hle. Kan ram leh hnam tan ro hlu a tling takzet. Mizoram University kan neih hnu hian zirna leh thiamna lamah pawh hma kan sawn chak viau a. Chutih rual chuan tuna kan thlen chinah hian lungawi mai tur kan ni em? Ram leh mihringin hma kan sawn zel a, thiamna lamah kan intlansiak reng a. Midangte pawl ve phak tur chuan kan neih tawh sa tihchangtlun leh ram leh hnamin a mamawh thlir chunga a dang neih belh zel dan kawng ngaihtuah hi tihmakmawh a ni. Mizoram State, zirna ngai pawimawh leh lehkhathiam tamna ni siin keimahni pual State University emaw, Private University emaw, kan la nei miah lo hi a veiawm lai ber chu a ni.
Mizoram University hi Central University a ni a. Kawng hrang hrangin kan ram leh hnam tan hmasawnna min thlen tih kan hre theuh a. Chutih rual chuan ‘central university’ a nih miau avangin kan rama thuneitute hian hma a sawn zelna turin ngaihtuahna ril tak seng thin mah se, an thil ruahmante tipuitling turin an duh anga kal theih loh chin an nei tih kan hriat tel a tha awm e. Hemi avang chauh pawh hian Mizoram University hian a nih tur ang a ni phak lo hlein a lang.
Mizoram University hi Central University a nih miau avangin subject zir tur chungchangah pawh state-in thuneihna kan nei lo hle. ‘Kan ta’ kan tih rual hian thiltih a harsat tlat chang a awm. Keimahni pual liau liau Christian University nei ila chuan kan hnam mil leh kohhran mipuite rilru mil zawng ‘subject’ kan dah belh thei ang a, kohhran leh ramin kan tangkaipui viauin a rinawm. Banaras Hindu University te, Aligarh Muslim University te hian University Grant Commission hriatpuina leh pawmpui thlapin fing takin anmahni sakhaw zirtirna lam hawi zir theihna turin department an hawng a. Christian University nei ve ni ila chuan, keini pawhin kan ti ve thei ang.
Kan hnam chanchin leh kan hnam ro hlu zir zauna tur ‘zirna in pui’ tia chhal ngam kan la nei lo ringawt pawh hian rualawh a tina hlein ka hre bawk. Hnam naupang tê angin miin min hre mah se, kan hnam zia leh nunphung, kan khawsak zia (culture and society)-te hi zir tham a awm ve ngei mai. Mahse, chutiang zir theihna chu kan la neih tlat si loh avangin kan la zir lo mai zawk a ni. Keimahni pualin university nei ila chuan ‘Mizo Study Center’ kan din thei ang a, kan hnam than chhoh dan (history) zir nan te, kan hnam nunphung leh ziarangte vawnhim nan leh vawn nun zel nan pawh thil tangkai tak tur a ni ang. Museum changtlung tak han din thei ngat phei ila chuan keimahni mai bakah khualzin veivakte ngei pawhin an ngaihlu hlein a rinawm. {Kum sawm vel zet liam taah khan Mizo history hi scientific taka chhui chian (research) a tul thu ka lo ziak tawh nghe nghe a ni}.
Khawvel ram hrang hranga zirna in tha bikte nen thawhhona thuthlung (MOU) siam chungchangah pawh zalenna thui tak kan nei thei ang. Tuna kan dinhmun mekah chuan hemi kawnga hma han la tur pawhin kan kut phuarin a awm deuh tlat niin a hriat a, rilruin duh mah se daltu a awm leh thin. Kan thalai, lehkha thiam tak takte chauh hi a hlawkna teltu tur ber emaw kan ti mai thei. Mahse, a nihna takah chuan kan ram hi a hlawkna teltu tur ber kan ni dawn. Chu chuan kan hnam zahawmna nasa takin a belhchhah dawn a ni.
Mizoram Christian University hi Private University ni se, Chancellor atan pawh kan kohhran hruaitu an tang thei ang. Vice-Chancellor tur atan pawh kan kohhran hruaitu secular education a doctorate nei kan neihte ruat mai tur an ni bawk ang.
India ram chhung leh ram pawna university dangte nen ‘academic & cultural exchange programme’ kan buatsaih thei ang a. Kan thalai rual te’n national leh international-ah rual an pawl ang a, ‘exposure’ tha neiin inring tawk (confident) takin ram hmangaihna nen ke an pen thei tawh ang. Zirna kawnga hma kan sawn bakah khawvel mithmuhah kan hnam ziarang tarlanna leh pho chhuahna kawng zau tak a ni nghal bawk ang.
India danpui mila din a nih dawn avangin foreign atangin zirlai pawh kan nei thei ang a, faculty exchange programme duangin khawvel huap pawh a mi thiam bik, Professor te’n kan zirlaite an rawn zirtir ang a, kan professor-te pawhin khawvela University tha-ah lecture an pe ve thin tawh ang.
Pathian Thu Zirna Atan Kan Mamawh:
Kan ram hi Kristian ram a ni a, zirna kan sawi reng rengin Pathian thu zirna kan ngaihthah thiang lo. Mahni puala University neih hi Pathian thu zirna tlang atanga thlir pawhin kan mamawh tawh hlein ka hria. Banaras Hindu University (1916) leh Aligarh Muslim University (1920) a din theih chuan Kristian sakhaw vuantu tam berna state-a Christian University din hi a hunin a inhmeh hliah hliah a ni. Heng university pahnihte hian min tlansan thui tawh hle a, chak taka kan um ve hi a tul tawh takzet a ni.
Pathian leh kohhran zarah Serampore College-ah kum sarih pumhlum ka lo thawk ve ta reng mai a. Hemi hun chhung hian Central lamah sawrkar a inthlak a, tunhma ang ni lovin kawng hrang hrangin zawhna a lo kal thin a. Chung avangte chuan kei pawhin kan lo kalphung leh India ram pum huapa Serampore College-in Pathian Thu zirna a kalpui thin dan hi ka theih angin ka zir chiang ve ta a. Kan Dan bu leh inkaihhruaina kan neih hrang hrangte ka chinglet nasa hle. Chuta ka hmuh chian em em chu Pathian Thu zirna kan kalpui dan hi dan mit atanga thlirin a him tawk lo va, buaina hmachhawn thei kan lo ni reng mai, tih hi a ni.
Kan rama Pathian thu zirna in (institution) tam zawkte hi Serampore College hnuaia peng (body) pakhat ‘Senate of the College’ hnuaiah inziak lutin (affiliate) Serampore College degree kan dawng thin. Kan rama Pathian Thu zirna in kan neih – Aizawl Theological College (ATC), Academy of Integrated Christian Studies (AICS), Maraland Theological College te pawh ‘Senate of the College’ hnuaia inziak lut an ni. Hetiang kan nih mek lai hian Serampore College kalphung leh thuneihna lam erawh kan belchiang lem lo niin a hriat thung. India ramin boruak hrang hrang a tawn chhoh mek atanga thlir phei chuan zirchian deuh a tul ta hle mai. Serampore College chanchin tlangpui hi chu kan hriat tlan a nih avangin he lam hi chu tarlan ngai lovah ngaiin a thuneihna, dan leh dun lam hi luhchilh deuh ila a tha ang e.
Serampore College hi kum 1818 a din niin, kum 1827-ah Denmark lal, King Frederick VI khan ‘Royal Charter’ a pe a. Hemi avang hian theology-ah degree pek theihna a nei a. ‘Royal Charter’-ah hian ‘Council of the College’ din a nih thu tarlan a ni bawk. (Khatih hun lai khan Serampore khua hi Denmark sawrkar ta a ni). He ‘Royal Charter’-ah hian Serampore College hi College a nih ang takin ‘college’ tiin tum 27 tarlan a ni a. University thumal hi vawi khat mah a lang lo. Syllabus hmasa ber hi kum 1819 a siam a ni a, London-a chhut (print) a ni. A tir atangin Pathian Thu zirna leh zirna pangngai kalpui nghal a ni bawk. February ni 22, 1845 khan British sawrkar khan Denmark sawrkar atangin Serampore khua hi ‘Treaty of Purchase’ hmangin a lei chhawng a. Serampore College hi British India dan (general law) hnuaia awm tura ruahman niin he ‘Royal Charter’ hi tidanglam lovin, a thuneihna (rights) hi chhunzawm zel tura tih a ni.
Serampore College hian zirna thuang hnihin a kalpui a – Arts, Science, Commerce (ASC) leh theology zirna te a awm a. Arts, Science and Commerce (ASC) Departments chuan kum 1857 a din University of Calcutta a zawm (affiliate) nghal a, affiliation nei hmasa zirna in pariat zingah a tel ve a ni. Serampore College atanga Arts, Science and Commerce zirte chuan University of Calcutta degree an dawng a. Tun thleng hian hei hi la chhunzawm zel a ni a; Tunah hian Serampore College-a ASC Departments chu UGC ah 2(f) & 12 (B) neiin a awm mek a ni. University of Calcutta a zawm avangin All India Survey of Higher Education (AISHE) Code pawh danin a phal angin a hmang thei a ni. AISHE hi Ministry of Human Resource Development (MHRD) hmalaknaa siam a ni a. Tunah hian Department of Higher Education, Ministry of Education hnuaiah a awm. Serampore College in 2(f) leh 12 (B) a neih hian theology a huam tel lo tih kan hriat a tha ang. Hetiang a nih mek lai hian Serampore College hian atir atangin Secular leh theological education a kalpui avangin,ASC Departments 2(f) leh 12 (B) hmanga a pawmna ah hian theology hi min pawmsak ve turin UGC ah lehkha thehlutin hotute ka dawr mek bawk. Amaherawh chu beisei a sang vak lo. UGC lam pawh an inngaihtuah nasa khawp mai.
Serampore College hian ‘Royal Charter’-in a thuneihna a pek angin kum 1827 atang daih tawh khan ‘theology degree’ pek theihna a nei tawh a. Chuti chung chuan kum 1915-ah chauh khan a vawi khatna atan mi pathum hnenah ‘theology degree’ hi hlan a ni. Han ngaihtuah vang vang chuan Pathian thu zirna lam hi a thang chak vak lo em ni a tih theih awm e.
Serampore College Centenary kum 1918-ah British India chuan Bengal Act IV of 1918, The Serampore College Act, 1918 chu Serampore College hnenah a pe leh a. He dan hi ‘Royal Charter’ leh ‘Statutes and Regulations’ belhchhahna (supplement) leh thenkhatah chuan luahlan (certain matters to supersede) tura tih a ni. He dan tharah hian Serampore College hi College a nih ang takin ‘college’ tiin tum 30 tarlan a ni a. University thumal hi vawi khat mah tarlan a ni lo. Bracket chhunga ‘University’ dah hi khatih laia thuneitute’n eng emaw hun laia an dah chawp mai niin a lang. Khatih laia sawrkar thuneitute hnen atanga phalna emaw, hriatpuina lehkha emaw hmuh tur a awm lo. ‘Royal Charter’ leh ‘Statutes and Regulations’ a thuneihna (provisions) awmte zingah hian Serampore College Act, 1918 kalh (contrary) a awm a nih chuan he dan hian a luahlan (supersede) vek thu pawh ziah lan a ni bawk.
He dan tharah hian Serampore College-a thuneitu ber, Council of the College chu tihlen a ni a. Serampore College hnuaia awm turin peng (body) pahnih ‘College Faculty’ leh ‘Senate of the College’ te chu Council-in a din (constitute and appoint) turin a siam thar bawk. He dan pumpuiah hian nihna (designated post) pahnih chiah tarlan a ni a. Chungte chu ‘Master’ leh ‘Principal’ te hi an ni.
The Serampore College Act, 1918 hi tunhma lam kha chuan leklam leh hman tangkai a ni ngai lo. He dan thuneihna leh huam chin pawh ngaihtuah lem lovin a remchan leh tulna avangtein Serampore College pumpui hi a lokal thui hle a ni tih he dan atanga thlir hian a chiang khawp mai. Serampore College Act, 1918 hi British India dan a ni a, khatih laia Bengal Province tana siam a ni bawk. Chuvang chuan Bengal Act IV of 1918 tih a ni ta reng a ni. He dan buah hian a siam chhan, a tum, thuneihna (Preamble) chiang takin a inziak a. Lehlin sualte a awm loh nan a inziak ang ang hian han tarlang ila:
-- Advertisement --
WHEREAS, on the 23rd day of February, 1827, the institution established in Serampore, Bengal, and known as the Serampore College, was incorporated by Royal Charter granted by his late Danish Majesty, King Frederick the Sixth with the powers and privileges in the said Royal Charter set forth including the power of conferring upon the students of the said College degrees of rank and honour according to their proficiency in science.
Tichuan, The Serampore College Act, 1918 hi kha tih laia Bengal Province tana siam a ni a. Degree pawh he college-a zirlaite hnena pek tur a nih thu chiang taka tarlan a ni. Eng vanga Serampore College zirlai ni lote hnena pek nge a nih? Engtia affiliated college hial lo nei ta nge a nih? Eng thuneihna hmanga tih nge a nih? tihte leh a kaihhnawih dangte hi zawhna lian tak a ni ta a ni. Khatih hun laia thuneitute atanga phalna (permission) emaw, hriatpuina (consent) emaw, a kaihhnawih lehkha pawimawh dang hmuh tur engmah a awm lo.
Kum 1947-a India Independence hnu khan India sawrkar chuan ‘India Dan’ chi hrang hrang a siam chho ta a. Kum 1947 hma lama British India dan lo awm tawhte chu tihtawp (repealed) a nih loh leh India dante a kalh loh chuan hman chhunzawm theih a ni a. Kum 1956-ah India Parliament chuan dan siamin, India rama zirna sang (higher education), Central Universities, State Universities, Private Universities leh College te enkawl turin University Grants Commission (UGC) a din ta a. UGC hian degree pe thei tur te, eng degree nge pek tur tih te, eng subject nge a pawm theih tih te chiang takin a tarlang a. Theology subject hi a pawm zingah a tel loh bakah a degree pawh hi a pawm lo a ni. Tun hnai mai khan UGC hian Eastern Regional Office, Kolkata leh a dang Mumbai, Chennai a mite pawh titawpin UGC hmunpui Delhi-ah a hnuk let vek a, College Development Bureau (CDB) a din thar nghe nghe.
Serampore College-in Bicentenary kan lawm atang khan UGC hian Serampore College hnuaiah affiliated college an awm tih an hre tawh a, an ngaimawh khawp mai. An chhui chian mek thu leh zawhna tam tak min zawh tur thu pawh min rawn hrilh tawh a. Kan dan leh ‘documents’ kan neih atang chuan kan chhang thui thei vak dawn lo niin a lang. Kan awm zel dan tur hi kan chiang lo hle. Kan dan neihte hian tuna kan kalphung hi a huam phak loh avangin khawilai atangin emaw beihna tak tak tawk ta ila, kan dinhmun hi a chhe hle thei dawn tihna a ni a. Serampore College-in theology a kalpui hi chu ngaihtuahawm a ni lo; mahse, Senate of the College kaltlanga Pathian thu zirna in hrang hrangte leh India ram Pathian Thu zirna kalphung hi chu a nghawng danglam dawn a ni.
West Bengal sawrkar ka dawrna leh sawihonaah pawh a subject leh degree hming (theology and divinity) hi thlak turin min rawn fo thin. Banaras Hindu University leh Aligarh Muslim University a an tih zulzuiin, ‘Studies of Christianity’ tia thlak turin min sawipui a. UGC lama thuneitute pawhin State sawrkar atanga dan thar nei turin thurawn min pe bawk. Mahse, India-in dan hrang hrang a neih tawh ten kawng hrang hranga min phuar tawh avangin a ‘nomenclature’ thlak hi tih chi lohah ngaih a ni. Dan thiam (lawyer) kan rawnte pawhin dan thar neih hi tha min tihpui lo vek a ni.
Hengte avang leh tun tuma tarlan kher loh chhan hrang hrangte avangin Christian University kan neih ve hi a ttul ta hlein ka hria.
Engtia Din Tur Nge?
Mizoram Christian University din rawt hi a thu a len ang aiin a kawng hi a harsa lutuk lo.
Hemi chungchangah hian UGC chuan thuchhuah a siam a. An thuchhuahah hian Supreme Court thutlukna (judgement) pawh an tarlang tel nghe nghe. UGC-in letter no. D.O. No. F. 9- 8/2008 (CPP-I/PU), August ni 12, 2015-a a tihchhuahah chuan hetiang hian a tarlang:
“The State legislatures have the power to establish the State Universities and Private Universities by passing an Act in their respective Legislative Assemblies. In the case of Prof. Yash Pal vs.Government of Chhattisgarh, the Hon’ble Supreme Court of India has made it adequately clear that it is only the Parliament which is competent to enact laws for the whole country and the StateLegislative Assemblies can enact law pertaining to the territorial jurisdiction of the concerned state.
The University Grants Commission by its Act of 1956 has been empowered to take all necessary steps which it deems fit for promotion and coordination 6 of higher education and for determining andmaintaining the standards of teaching, examination and research.”
A chunga thuchhuaha kan hmuh ang hian Mizoram Christian University din tur chuan State Legislative Assembly-ah bill put luh a, pass a, State Act neia felfai taka din theih a ni. Mizoram State sawrkarin dan siama Mizoram Christian University Act kan neih chuan UGC pawhin a pawm nghal ang. India danpui mil leh pawm thlapa din a nih dawn avangin India sawrkar hnuaia ‘scholarship’ leh ‘funding agency’ hrang hrang atangin hamthatna kan dawng thei ang.
Kohhran hrang hrang tangrualin din thei se. Entir nan- tuna Theological changtlung tak nei, Mizoram Presbyterian, Mizoram Baptist Kohhran leh Mara Evangelical Kohhrante hian hma la tlang thei se, a duhawm berin ka hria. Hei hi kan thei lo a nih pawhin kan rama kohhran lian ber Presbyterian Church of India, Mizoram Synod, tal hi chuan din ngei turin hma la se a duhawm hle mai.
Mizoram Synod-in tuna zirna in kan kalpui mek leh an dinhmunte han thlir pawh hian university din turin kan dinhmun hi a tha khawpin ka hria. Pathian thu zirnaah phei chuan India rama zirna in nei tha ber tia chhal ngam kan nei mek a. Khawvel thiam zirna lamah pawh hma kan la tan mek bawk a. Hei hian dinhmun duhawm takah min dintirin ka hria.
‘University’ tih avanga engkim changtlung leh felfai sa vek tura beisei tur a ni lo vang. India ram leh khawvela university tha kan tihte pawh hi a din tirh atanga engkim peih sa vek ni lovin, an din a, a thang ve zel a, university ropui takah a thang chho thin zawk a ni. Tuna Mizoram University changtlung tak pawh hi an din tirh kha chuan mi in luah hawh mai maiin bul an tan tih kan hriat kha. Tuna kan sawi tak Kohhran pathumte dinhmun mek ang hian Mizoram Christian University hi din ila, university tam tak nena khaikhin pawhin dinhmun tha takah kan ding nghal thei ang.
A Ruangam Tur Duan Uluk A Ngai Ang
Mizoram Christian University hi lo din dawn ta ila, a tir atangin a ruangam tur duan kawngah ruamhmana fel tak kan neih a pawimawh ang. A syllabus te, a zir dan kalhmang tur te, degree kan pek tur te leh tul dangte uluk taka duan a ngai a. Tuna kan tihhlawhtlin theih mai te, nakin huna tihlawhtlin turte ruahmanna fel tak neih a tul bawk ang. Zirna leh eizawnna kawnga hma kan sawn zel dan thlirin ‘professional course’ hrang hrangte pawh la tel tura ngaihtuahna kan neih a tul. A bikin Synod Hospital leh Nursing College changtlung tak kan neih sa tawh hmang tangkaiin Medical College hial pawh he university hnuaiah hian kan la kalpui thei ang.
University hi chi hnihin a then theih a, pakhat chu ‘affiliating university’ niin, hetiang university hnuaiah hian affiliated colleges a awm thei. Pahnihnaah chuan ‘unitary university’ niin ‘stand alone university’ te pawh an ti bawk. He university hi chuan affiliated college a nei lo. A pumpui kha university-ah khan an bet vek mai. Mizoram Christian University kalphung atana kan duh zawk thlan mai tur a ni ang.
Pathian thu zirna lama subject hrang hrang zir tur leh degree kan pek theih turte pawh uluk taka duan a tul lehzual ang. Bachelor degree atanga Postdoctoral degree thleng pe thei tura ruahmanna siam a finthlak hlein ka ring. Degree neite pawhin sawrkar hnaa an luh theihna tur zawnga kalpui ni se. Sawrkar hnathawkte pawhin Pathian thu zirna lamah ‘background’ tha tak an nei ang a, an hnathawhna apiangah an tangkai lehzual thei bawk ang. Tunlaiah chuan, a bik takin khawvel huapa Christian pawl hrang hrangah te phei chuan, ‘theological’ leh ‘secular education’ neih kawp hi a tangkaina a tam ta khawp mai.
Mizoram Christian University atanga zirchhuakte atang hian Pastor turte pawh kan thlang tawh mai ang a. Chutiang atana kan thlante tan chuan kum khat emaw, kum hnih emaw Pastor hna atana tul zawng zawng telna ‘course’ hran siamin uluk takin kan zirtir leh mai ang a. Practical ministry pawh uluk zawkin, India ram leh International thlenga tawnhriat an neih theihna turin ruahman theih ni se. Heta zirchhuakte chauh hi Pastor atana lak ni se kan thatpui ngei a rinawm. Hetiang taka kan buatsaih chuan khawvel huap Christian inzawmkhawm pawl hrang hrangahte hian a hotu chan (leadership) an chang ve thei tawh ang.
Pastoral ministry atana a bik taka inbuatsaihna kalpui ang tho hian, zirlai thiam thei bikte chu India rama competitive exam hmachhawn turin thlurbing pah ni se. Tuna kan rualawh leh mamawh I.A.S., I.P.S leh a dangahte hian kan luh belh theihna kawng pawh a inhawng ngei ang.
Tlangkawmna:
Ngun taka kan khawvel than chhoh dan leh zirnain hma a sawn zel dan te, India ram politics inlumlet dan han thlir hian Mizoram Christian University din hi a hun tawh takzetin ka hria. ‘Theology’ leh ‘secular’ zirna hmunpui siam hi kan ram zirna siam tha tura tihmakmawh a ni ta. Mizoram, zirna ngai pawimawh leh lehkha thiam tamna, Pathian Thu zir uarna ram leh ‘Christian State’ tia inchhal leh hnam dang leh sakhaw dang betute pawhin an hriat ni mekin Christian University, keimahni ta ngei neih hi tihmakmawh a ni tawh.
Secular education zirlaite chuan sawrkar pawmpui ngei ‘certificate’ an hlawh chhuak a, Pathian Thu zir chhuakte erawh chuan dan mit atanga ‘certificate’ tling lo an hlawh chhuak thung. Hei hi a veiawm hle a, kohhran kal zel tur atan pawh a him lo lai a awm thei. Chuvang chuan Pathian Thu zir chhuakte pawhin University Certificate, dan mit atang pawha tling ngei certificate an dawn theihna tur kawng ruahman hi Kohhran pawhin kan mawhphurhnaa kan lak thiam a pawimawh hlein ka hria. Mizoram Christian University hi kan din a nih chuan Pathian Thu zirna college pakhata zirlaite tana degree pek theihna tura danin a ziah kan lo tawmpui ve reng hi tihban a ni tawh ang a, lungmuang takin Pathian Thu zirna pawh kan kalpui thei tawh ang.
Heng ka han sawi takte hi naktukah Mizoram Christian University i din nghal ang u, ka tihna a ni hran lo va, mahse heng thute hian kan ngaihtuahna kawngkhar hawng sela, a hma thei anga a kawng kan zawn a tul a ni, tih ngaihtuahna min pe se, a duhawm hle.