MIZORAM CHURCH COUNCIL (?)

By Rev Dr Ramengliana

Thilmak deuh pakhat chu Isua Krista ringtute zinga inpumkhatna sawi a ngai reng mai hi a ni. Hei hian mihring chak lohna a tilang chiang hle awm e. Isua khan a zirtirte ngei ngei pawh an lungrual dawn lo tih kha a hmu lawk fiah hle a ni ang. A pa hnenah pumkhat an nih theih nan a dil ngawih ngawih mai a nih kha. Hei tak hian inthendarhna leh innghirnghona hi Setana hnathawh, Pathian Thlarau Thianghlim atanga chhuak ni lo, Pathian thiltum ni miah lo a ni tih a chiang khawp mai. Chutih lai reng chuan mihring pangngai zingah mai pawh ni lo, Isua ringtute ngei pawh neuh neuh leh innghirnghona hian min la tibuai zel a nih hi. Than san a har ngang a ni. Kristiante tana chona awm reng tur thil pawh a ni mai thei. Chutih rualin mimal nun leh ram pum huapa inlungrualna leh inpumkhatna nei tura tan lak reng leh innghirnghona leh inthendarhna te do reng nun kan neih a tul dawn bawk a ni.
Lalpan thil ropui min tihsak e
Hmanni lawk khan Mizoram kohhrante chuan bung thar kaiin rahbi duhawm leh chhuanawm tak a kai ta. Kohhran 5 – Mizoram Presbyterian Kohhran, Mizoram Baptist Kohhran, Evangelical Church of Maraland, The Salvation Army, Lairam Isua Krista Baptist Kohhran, te chuan Mizoram Church Council (?) din an remti tlang ta. Van mipuite pawh an lawm ngei ang le. A ruangam tur leh a nihphung turte chu ngaihtuah zel a ni ang a. A nih dan tur ang tak a nih hlan a nghahhlelhawm tawh hle mai. Hetianga lungrualna hawi zawnga Mizoram Kristianten ke kan pen zel hi thil ropui leh chhuanawm tak a ni. Kan biak Pathian lawmzawng tak a ni. Kan inpumkhat zual poh leh kan chak dawn tihna a ni a, kan chak poh leh a chhunga mite chuan nuam kan ti dawn tihna a ni bawk. Tin, Pathian Ram rawngbawlnain hma a sawn ang a, chu chuan Pathian Ram a tizau zel dawn a ni. Inrem lohna leh innghirnghona hian tha thlawn min sen hnem tir a, tul lo kan buaipui phah nasa a; chuti pah chuan kan Lalpa Isua Krista hmai kan tat bal zel bawk si. Mizote zinga kohhran hrang hrang lo awm ta nuai mai hi han chhui chian chuan a chhan a lian hlawm lo viau awm asin. Sawifel ngaihna awm lo a awm miah lovin ka ring tlat. Mi thenkhatin rote kawla sepa anga thuneihna leh chanvo tha an duh vang mai mai anga ngaih theih pawh a ni hial mai thei. Chuti a nih loh pawhin rilru puitling lo leh ngaihtuahna changkan tawk loh vangte pawh a ni mahna. A eng pawh ni sela, than sana inpumkhatna kawngpui zawh tura kohna a ring ta hle a nih hi. A nih dan phung tur ngaihtuahin kan mithiamte han phu suau suau sela, mipui lam i tawngtai sauh sauh ang u.
Mizo Kristiante hi inpumkhat tak kan ni sa
A tir atang rengin Mizoram ringtute chu inpumkhat leh inunauna boruak sang tak a ni a. Hmun dang kohhrante hnenah sawi a nuam thin. Mahse engemaw lai khan chu kan hloh then nual a niawm e. Chuti chung chuan mi tin rilru-ah hian inhuatna leh inenhranna tak tak hi a awm mawh fu a ni. Isua Krista ringtu kan nihna leh Pathian fa kan nihna theuh hi kan hrethiam tlang hlawm a, kan mihrang tak tak thei lo ni berin ka hria. A chang phei chuan eng nge Zoram Kristiante danglamna hi? tiin han zawt ta ila chhan a har phianin ka ring thin. Mipui hian zai leh hlim lam hi nuam kan titlang vekin a hriat a, a titam peih vak lote pawhin harhnaah chuan kan phur surh vek a nih hi maw. He harhna ngaihsanna hian kohhran tin a fan vek. Mizo Kristiante rilruah a intuh nghet theuh a niang. Chanchin Tha hril ngaih pawimawhna leh ringlote veina thinlung hi kan nei theuh bawk a. Hei hi hmun dang Kristiante pawhinin min ngaihsanna chhan a ni. Kan thinlunga chung Pathianin a khawngaihna avanga a lo tuh ngheh a ni ngei ang. Tichuan, kan Pathian Thu thiamte thuziak leh veizawngte hi han chikin han chhiar ila, danglamna a tam lo hle a ni tih kan hre thei mai bawk ang a. A hre lote hnena Chanchin Tha hril ngaih pawimawhna bakah kan khawtlang nuna Chanchin Thain rah a chhuah tur anga a chhuah tawk lo hi an vei tlang a nih hi. A veiawm bawk a. Mizoram, Kristian ram ni si heti taka khawvela kan eng chhuak hleithei lo, ei leh bar zawnna leh khawtlang nuna khawvel eng kan hmu pha hleithei lo, hi pawi an titlang vek tih theih a ni. Kan kohhran bil te te inrelbawl dante lah chu a hming kan tidanglam deuh e tih mai lovah chuan nihphung inang tlang vek, thiam dan leh nuam tih zawng inang sa thlup mai kan nih hi. A eng chu nge kan danglamna? tia zawh let theih a ni hial awm e. Zawn chawp leh phuah chawp deuh a ngai hial a ni lo maw?
Council piah lam thlengin thlir pha ila
Mi thenkhat chuan Council aia tha zawk pawh hi Mizoram Kristiante hian kan tlinin an hre hial. Dik pawh a dik mai thei. Kohhran pakhata luan za vek mai hi thil theih loh a nih hmel lem loh. Lo ni dawn ta ila chuan chin fel a, han thliar fel tur chu a tam thei ang. Amaherawhchu, Mizoram Kohhran (Church of Mizoram) han din rup tur pawh hian Mizoram Kristiante hi chu kan inpeih thui viau a ni. A chunga kan sawi tak ang khan thurin(doctrine) leh tihdanphung (tradition)-ah danglamna han mutan ngial tur a tam lem lovin a hriat theih a. Inrelbawl dan kalhmang lah kan thiam dan inang sa leh kohhran boruak hrim hrim kan duh dan inmil kha a ni miau a. Inpumkhatna chungchangah hian Mizoram kohhrante hi a let zawngin kan kal emaw tih theihin tun hun ai hian tun hma lehzualah khan kan lo inpumkhat tha zawk reng a lo ni a, a pawi hle a ni. A tira boruak kan neih anga inpumkhatna rilru neih piah lamah a tira mi aia tha pawh kan chher thar thei a ni tih hria ila. Kum 1970 chho vela North East India Christian Council-in India hmar chhak kohhran zawng zawng awmna tur Church of North East India din tuma Constitution meuh pawh a siam vek tawh hnu khan khatih laia Mizoram kohhrante kha chuan an remtih a, an pawm thu an lo hriattir vek tawh a nih kha. Inpumkhat hi kan lo nih tawh leh kan lo duh tawh dan vek a ni zawk tih hriat a tha a. Pathian min hruaina kawng leh kan zui ngam chin i thlir zel phawt teh ang.