England tana goal thun hnem ber Kane

March 23, Ningani zan khan Euro 2024 khel tur zawnna Euro qualifier khelh tan a ni a. England chuan kum 1961 hnu lama a vawikhat nan Italy chu Italy leilung ngeiah an hneh. 2-1 European champion Italy an hneh tum hian Harry Kane chuan goal khat a thun a, Kane hian Wayne Rooney record khumin England tana goal thun hnem ber record thar a siam. Ninga zana inkhel dangah Denmark in hnehna an chan bawk.
England hian Euro 2020 final-a an hneh loh Italy hi Napoli khelmualah Diego Armando Maradona stadium-ah an luh khung a, inkhel hautak hmangin Euro 202 khel tur zawnna bul an tan. Mimuala inlan ni mah se Three Lions hian an khel tha viau a, kim lo zawk ni chungin Italy lakah point thum an hlawhchhuak tho thung.
Napoli khelmuala inkhel ngaihven hlawh takah hian England in bul an tan tha viau a, na taka an khingpuite nawr nghalin rawlthar duhawm Bakuyo Saka leh Jude Bellingham ten Italy an tihthat a, si nghak Donuruma chethat vangin goal erawh an thun nghal mai bik lo. Hun tha vawi hnih an hlah hnuin minute 13-naah England hian goal an thun ta nge nge. Saka corner pet tha tak chu Harry Kane chuan hnaite atangin a pet a, Italy player ten an dang hman hlauh. Kane ball pet, per let leh hi Declan Rice chuan goal ah a chantir a, hmahruaina goal a thun.
Hmahruaina goal an thun hnuin England an khel tha chhunzawm a, Kalvin Phillips-a’n a sial hret vangin uiawm tain an hun tha an hloh. Uiawm taka an hun tha an hlah hnu lawkah Saka chuan fuh zetin corner a pet a. He corner atang hian vanneihthlak takin penalty an hlawhchhuak. Handball vanga penalty an hmuh hi Harry Kane chuan minute 41-naa chiang zetin a pet goal a, si hnih faia hma an hruaina goal a thun a, si hniha hmahruai chungin chawlhlawk an hmang zui nghal bawk.
Chawlhlawk hnu lamah European champion Italy an khel tha hret a, goal pawh an thun har lo. Chiang zeta England tlarhnung an thiah darh hnuin Mateo Retegui chuan minute 56-naah goal a thun a, an si phurh a sut then. Italy goal neihchhun thuntu Retegui hi Italy tan a khelh vawi khatna a ni a. Ram tan a inlan hmasakna berah goal a thun nghal hian inrintawkna sang zawk a pe ngei ang.
Second half tir lamah goal an thun vangin Italy an phur viau a, an mualah tlawm pumpelh ngei tumin tan an khawh chhunzawm. Na takin an mikhualte an nawr a, mawi taka England tlarhnung an thiah hnuin England defender Luke Shaw chuan a tih tur tiin Retegui a titlu a, Luke Shaw hi hnawhchhuah a ni. Tam zawk an nih chhawr tangkai ngei tumin Roberto Mancini team ten tan khawh mah se an si phurh an sut zo thei lova, England lakah uiawm takin an tlawm. Inkhel hautak takah 2-1 chakin England chuan Italy-a hnuhma chhe tak an neih an thaichhia a, kum 1961 hnu lamah a vawikhat nan Italy ramah ngei mualneitu Italy an hneh ve ta nge nge.
Italy an hneh vangin England hian Group C-ah hma an hruai nghal a, Group C-a team panga zingah Italy hian table mawngphah an luah rih thung.
Ninga zana Group C inkhel dangah North Mace-donia chuan 2 – 1 in Malta an hneh a, an Group-ah pahnihna an ni mek.
Rooney khumtu Harry Kane
2-1 a Italy an hneh tum hian England captain Haary Kane chuan goal khat a thun a, penalty atanga goal a thun hmangin Wayne Rooney record a thaichhia a, England tana goal thun hnem ber record thar a siam.
Kum 29 mi Kane hian England tan vawi 81 khelin goal 54 a thun tling chiah a, England tana goal thun hnem ber ni thin Wayne Rooney goal thun zat 53 chu goal khatina lehpel. Harry Kane-a’n goal thun tam lama a lehpelh tak Rooney khan England tan vawi 120 khelin goal 53 a thun. England tana goal thun hnem ber thar Kane hian a khum tak Rooney aiin Three Lions tan vawi 39 zetin a khel tlem zawk a. Hei hian Harry Kane hi goal thun thei bik a nihzia a lantir chiang hle.
World Cup 2022-ah khan Kane hian record siam theihna hun remchang a nei tawh a. Quarter-final-ah France an hmachhawn tumin penalty a hlah vangin Rooney tlan pelh theihna hun remchang a hlah. France lamah hian pet goal se ni 103 zetin record a siam hma zawk dawn tihna a ni.
A record thaichhiatin awm mah se Manchester United leh England forward hlui Wayne Rooney chuan a record khumtu Harry Kane lawmpuina thu social media-ah a tarlang nghal var a. Tottenham tana goal thun hnem ber record lo siam tawhtu Kane chu Ronney hian ‘Legend’ tiin a fak hle. Kane pawhin Rooney lawmpuina hi hlim takin a chhanglet ve thuai bawk a, an inzah tawn thiam hle.
Denmark an chak
Ningani zana inkhel dangah Group H a awm Denmark chuan Telia Parken-a an mikhual Finland chu 3-1 in an hneh a, an group-ah hmahruaitu an ni nghal. Denmark tan hian Rasmus Höjlund chuan hattrick a siam a. Finland goal neih chhun hi minute 53-naa Oliver Antman thun a ni ve thung. Inkhel dangah si thum faiin Bosnia an chak ve baw