Mizoram Cricket League khel tur player lei fel

Mizoram Cricket League khel tur player lei fel
Mizorama tualchhung cricket inelnaa dahsan Mapuia Memorial Mizoram Cricket League season thar atan team leh player lilamna hun chu April ni 10, Thawhtanni zan khan Aijal Club-ah zawh fel niin, MCL 2023 Auction-ah hian tangka fai cheng 2,50,000 senral a ni.
MCL khel turin Luangmual CC leh Chanmarians CC-te’n sum sen an inhuam a, team hrang hrangte’n an squad an thuamtha tel bawk.
MCL khel tur Chanmarians CC leh Luangmual CC
Kumin MCL hi 1st Division League semi-finalist pali – Ramhlun Venglai CC, Zarkawt Lords CC, Kulikawn CC leh Gorkha CC-te khel turin an tling a; hemi bak hmunruak pahnih hi lilam a ni.
Team slot hmasa zawk hi tualchhung club hlun engnge-mawzatin an inchuh hnuah Chanmarians CC-in Rs. 5 lakhs-in an chhang a; team slot hnuhnung zawk pawh lilam leh niin, a tawpah Luangmual CC-in Rs. 6 lakhs-in an chang.
MCL dan angin team slot lei pahnihte’n player lilamna tan hmain an duh pahnih an thlang thei. Chanmarians-in all-rounder Nasib Rai leh top order batsman B. Lalnunfela an thlang.
Luangmual lamin state under 25 team rinrawl Jehu Anderson leh tawnhriat nei tha Lal-hmangaihate an thlang ve thung.
Zarkawt Lords an che na
Player lilamnaah club parukte’n an team tichak turin player 27 a belhkhawmin an lei.
MCL khel lo tur club tha an awm nual a, he’ng atang hian player tha an lalut.
Zarkawt Lords in player pasarih lakluh nan Rs. 76,000 an seng. Club malkhaia player lalut tura sum seng hnem ber an ni.
Chhinga Veng CC all-roun-der Lalruatdika chu Rs. 33,000 zeta chhangin, ani hi tun MCL Auction-a player manto ber a ni.
Chanmarians CC-in all-rounder K. Lalthazuala chu Rs. 28,000-in an lalut a; Luangmualin Lalhruaitluanga leina’n Rs. 24,000 an seng ve bawk.
Team parukte’n player lakluhna’n a belhkhawmin Rs. 2.5 lakhs an seng.
Player-te leina hi 60% an hnenah a kal ang a, association leh an khelhna club-te hnenah 20% ve ve a lut ve bawk ang.
April 17 atangin MCL 2023…
Kumin MCL hi April ni 17 atangin Suaka Cricket Ground-ah an khel tan dawn.
Kuminah hian champion team-in Rs. 3 lakhs an dawng dawn a, a belhkhawmin lawm-manah Rs. 12.75 lakhs sem ral a ni ang.
Nikum ang thoin kumin MCL hi Fancode kaltlangin live-in a en theih dawn a, awlsam taka application download a, subscribe turin App Store leh Playstore-ahte a awm.