Mizoram-in harsatna tawh hi thawnthu-ah kan chantir ang – Lalnunmawia Chuaungo

Mizoram-in harsatna tawh hi
thawnthu-ah kan chantir ang
– Lalnunmawia Chuaungo
NLUP changtlung zawka an kalpui leh hunah tuna Mizoram-in harsatna leh buaina a tawh chu thawnthu ah an la chantir dawn tih Congress hruaitu Lalnunmawia Chuaungo chuan a sawi.
Ningania Serchhipa Congress party hruaitute nen an inkawmnaah MPCC senior vice president Lalnunmawia Chuaungo chuan tunlaiin Mizoram-in sum kan harsa em em a. Sawrkar pawhin tihngaihna tak hre loin puk tur zawn chu a hna ber a ni tih a sawi.
“Hetih laiin ZPM sawrkar chuan kan ti ve loang an tih zawng zawng ti vekin mipui sum an chawma an hawp bawk laiin mipui thleng phak sum lengvak a tlem em em a. Hei hian rukruk, tualthah, in rawk, ruang chhar, ruihhlo tawlh a ti hluar a. Mahni taksa social media-ah langsar taka zawrh a ti hluar mek. Heng hi mipui hnen thleng phak lo sawrkar kan hrawnin a rah chhuah a ni,” a ti.
NLUP atanga tung chingtu hlawhtling Rualzakhuma hmalakna a hmunah tlawhin, NLUP-in chhungkaw tam tak dinhmun a khai chhuah nasat zia chu khawtinah zep theih loh khawpin a lang tih MPCC hruaitu hian a sawi.
Tung oil bakah a herna fe (cake) leh a hnah leitha atana siama hralh tham an neih bakah chhungkaw tam takin an zarah eizawnna an neih avangin NLUP chu Mizoram tan malsawmna a ni tih Lalnunmawia Chuaungo hian a sawi.
“Congress party a sawrkar leh hunah harsa zawkte thleng phak NLUP changtlung zawka kalpui a ni anga, tuna Mizoram-in harsatna leh buaina a tawh hi thawnthu-ah kan chantir dawn. Chutiang tur chuan kan inpeih tawh a, mipui pawhin min au a ni,” a ti.