Mizoram in W. Bengal an ngam lo

Last updated Jul 30, 2025 7 0
Amritsar, Punjab-a khelh mek Junior Boys National Football Championship for Dr B.C Roy Trophy 2025-26-ah Mizoram in champion lai West Bengal an ngam lova, semi-final paltlang zo lovin an tla. Mizoram hnehtu W. Bengal hian final-ah Delhi hnehtu Manipur an hmachhawn zui leh dawn.
Mizoram Junior team te hian semi-final-ah inkhel hautak zet mai an hmachhawn. Pahnih ngawta tlem zawk ni chungin Maharashtra nen 2-2 in an inhnehtawk. Tlem zawk ni chunga tlawm an pumpelh vangin semi-final an lut. Maharashtra lakah tlem zawk an nih reng vangin Mizoram team an chau a, an player pawimawh pahnih an inlan theih loh bakah coach in a vil thei lo bawk. W Bengal nen inhnehtawk viau mah se Mizoram vanneih ni a ni lova, 3-2 in an tlawm.
Champion lai W Bengal hian Mizoram hneh ngei tumin tan an khawh a, goal pawh an thun har lo. Inkhel tan atanga minute 15-na lekah Rintu Malik chuan hmahruaina goal a thun. Goal an thun hmasak vangin Bengal an phur a, goal thun belh tumin Mizoram an nawr nasa hle. Goal chhuah hmasa mah se Mizo player te an zam lova, ngam takin an khingpuite an nawr. Mizoram tan hian Joel Lalremruata chuan minute 26-naah goal thunin an si phurh a sut. Goal khat ve ve an thun hnuin inkhel a hmuhnawm zui viau a, 1-1 a inhnehtawk chungin chawlhlawk an hmang.
Chawlhlawk hnu lamah W Bengal an che fuh hmasa leh a, Mizoram tlarhnung player te chet fuh tawk loh vangin goal thun theihna hun remchang an nei. Goal hmahruai thuntu Rintu Malik chuan second-half tan atanga minute khat hnu lekah top corner-ah fuh zetin a pet goal a, hma an hruai nawn lehna goal a thun. Hnufual zawkah tang nawn leh mah se Mizoram an insiamtha thuai a, penalty an hlawhchhuak. Enok Lalchelzing chuan minute 66-naah penalty pet goal in an si phurh a sut nawn leh. Mizoram an phur thar leh.
An si phurh an sut vangin phur viau mah se Mizoram an phur rei lo. Goal hnih thun tawh Rintu Malik chuan mual laihawl atangin pui zetin a pet goal a, hma an hruai nawn lehna goal thunin Mizoram  lakah hattrick a siam. Mizoram hian an si phurh sut tum viau mah se an hlawhtling zo tawh lova, W Bengal ngam lovin an tla zui ta a ni.