Mizoram leh Sangha chhiarkawp

Fisheries Department Saitual District-te chuan tunkar Thawhtanni khan Keifang leh Saitualah subsidy-in Sangha chi pakhat Re 1-in an sem a.
Tunhma chuan sangha chi hi state pawn atanga lei vek a ni thin a, tunah chuan Fisheries Department-in fish farm 9 a enkawl mek zinga fish farm 6 chu sangha chi tharchhuahna tur ‘fish seed farm’ atan a siam ve tak avangin Mizoramin sangha chi a mamawh 50% chu state chhungah tharchhuah a ni ve ta a. Kan mamawh 50% dang chu state dang atanga chawkluh a la ni ta tho a ni.
Tun dinhmunah (2023-2024) Mizoramah hian sangha dil siam 19,809 an awm a, sangha dil zau zawng belhkhawm hi Hectare 5888.08 (Km 58.88 bial) a ni a, kum khata sangha thar chhuah chu Metric Tonne 5270.89 a ni. Chumi awmzia chu hectare khat (metre 100 bial)-ah metric tonne 0.90 (900Kgs) a thar chhuak tihna a ni. (source: https://fisheries.mizoram.gov.in).
Tuna Mizoram sangha tharchhuah hian Mizoram mamawh 40% a phuhru niin report-ah tarlan a ni a, kan mamawh atanga 60% chu state pawn atangin kan chawlut tihna a ni bawk. Chumi awmzia chu kum khata Mizoram mipuiin sangha a mamawh zat chu MT 13,175 tihna a ni a, heta tanga 40% kan tharchhuak a nih chuan, 60%=MT 7905 chu state dang atangin kan chaw lut tihna a ni.
Hei hi a sum zawnga chantir chuan, sangha Kg 1 hi Rs 120 anga chhutin MT 7905 chu cheng vaibelchhe 94.86 man tihna a ni a. Kum tin state pawnah sangha leina man cheng vbch 94.86 kan thehchhuak ziah tihna a ni.
Mizorama sangah dil zau zawng hectare 5888.08 hi a kilometre zawnga chantirin, a dung Km 58.88, a vang Km 58.88 tihna a ni. Mizoram hi chhak leh thlang zawngin Km 115 a ni a. Seling atanga Champhai (ramri) inkar hi Km 57.5 a ni a. Chumi awmzia chu, Mizorama sangha dil zau zawng chu chhak leh thlang zawnga Mizoram zatve deuh hmawk hi a dung leh vang ni ta se, chutiang vela zau chu a ni dawn tihna a ni.
India ramah hian sangha thar chhuah dan hi hectare khatah Kg 500 (average) anga ngaih a ni. Mizoram hian 900Kg/Ha thar ang a ni a, India average aiin a sang hle tihna a ni. Tun dinhmunah sangha dil siam theihna potential area hi 24000Ha vel a awm mek a, sanghaa intodelh tur hian sangha dil siam belh vak hi nge kan mamawh a, sangha dil awmsa tihchangtlun, tih hi ngaihtuah theih tak a ni awm e.