Larsap hmalakna in Mizoram lui atanga kawlpheta siamchhuah theih zat chu Prime minister-in a hnena presentation pek a remtih sak tawh a, hemi hma hian state Power & Electricity department leh Central Water Commission chuan lui hi zirchiang hmasa in, statistics inang an neih theihna’n en ho leh a ni.
Zirtawpni khan larsap Dr Hari Babu Kambhampati chuan Raj Bhavan-ah Mizoram P&E hotute leh sawrkar laipui Ministry of Jal Shakti-a Central Water Commission hotute hi a thutkhawm pui a. Mizorama lui luang atanga kawlphetha siamchhuah theih zat dik tak a ranglama zirchian dan tur sawiho a ni.
Larsap chuan Mizorama kawlphetha siamchhuah chungchangah Prime minister a hmu tawh a. PM hian tha taka lo ngaihthla in hun remchang hmasaah state P&E department-in Prime Minister Office (PMO) ah presentation an pek a lo remtih sak tih a sawi. Mizoram sawrkarin PMO-a presentation a pek hmain kawlphetha kan tharchhuah theih zat chiang zawka zirchian a ngai a. Survey & Investigation hi CWC leh P&E ten an neih tawh angin, statistics neih a ngai nia a hriat thu a sawi. Statistics inangkhat leh rintlak a ranglama neih a nih theihna’n CWC leh P&E chu information an neihte inpe tawn a, thawk ho turin a chah. Presentation atana proposal siam a nih dawnin Central Electricity Authority of India nen sawiho hmasak bakah an ngaihdan lak tha a tih thu a sawi bawk.
P&E engineer-te hi P&E secretary H Lalengmawia’n a ho a, CWC SE Preeti Choudhary chuan CWC official-te a ho thung. CWC team lamin an thil zirchian atangin powerpoint presentation an pe hmasa a. Hemi hnu hian tun dinhmuna an thil hriat dan leh hmalakna kalpui tawhte P&E official-ten an sawi a ni. CWC leh P&E report pekna eng atang hian thawhho dan tur leh hmalak zel dan tur sawi chhunzawm a ni.
Thutkhawm zawh hian CWC official-te chuan P&E engineer -in- chief Lalhmingliani Hmar an kawm a ni.
Mizoram lui atanga power siam theih zat PMO-ah thlen dawn
Get real time updates directly on you device, subscribe now.
Prev Post