Mizoram nurse-te fakawm

Nimin International Nurses Day khan Mizo zinga National Florence Nightingale Award dawngtute chawimawina hun hman a ni a. Hetiang award dawngtu Mizo zinga an awm thin hi a ropuiin an chhuanawm a, ram leh hnam tihmingthatu an nih piah lamah, mihringpuite tana rawngbawlna ngai pawimawhtu an nihzia a lang a, a ropui danglam bik riau a ni.
Tunhma deuh khan damlote leh damlo awmpuite laka lo inluling deuh an awm thin nge, nurse sawiselna ri a awm zauh zauh a. Nurse pahnih khat, tlema lo che fawr deuhte avangin nurse dangin an tawrh phah a, nurse hrim hrim khawlohna ang hrima phek en duh an lo awm a, a hming chhe zawnga pawn lama auchhuahpui duhte an lo awm a, nurse hming a thang mawi lo hle thin. An indaih loh thin dan leh an hah thin dan hi hriatchiansak ngat ila chuan, ‘an fakawm zawk ngawt mai’ kan tih a rinawm.
India ramah hian Indian Nursing Council-in Norms a neih, nurse-patient ratio 1:3 (general) ang diak diaka hospital enkawl theihna hi a awm lo a tih theih awm e. Mizoramah pawh hian kan civil hospital lian ber Aizawl-ah pawh hian, nurse pakhatin damlo 20/30 a vil changte a awm thin a, rilru leh taksa a hah dawn tih a hriat reng mai a, heti chunga kan nurse ten damlo an enkawl dan han hmuh hi chuan an fakawm tih loh rual a ni lo.
Hetiang hi kan dinhmun a nih laiin, nurse-te hian indaih lo chung chungin engtinnge tlin taka damlo an enkawl/vil theih chu le tiin kan inzawt a nih chuan, ‘an inpek zawh em vang a ni’ tih bak chu chhanna dang a awm awm lo ve.
Nurse-te pawh hian an hna hi sum thawhchhuahna satliah ang chuaha an thawk a nih chuan damlo enkawlna kawngah leh an hnaah an tui ngai lo ang a, rawngbawlna anga ngai lo leh thahnemngaihna tel lova damlo an enkawl a nih chuan, anmahniah chu chu a lo lang chhuak lo thei lova, mipuiin chutiang mite chu an hai ngai lo.