Thudik lo sawiah Apex Bank chairman puh

Thudik lo sawiah Apex Bank chairman puh
Cooperative Society Management Board-a kum 10 aia tam a zawna thut theihna dan thiah rawtna chu khawi assembly ah mah pass a la awm lo tih Mizoram Cooperative Siamtha Pawl chuan an sawi a. Hemi chungchang Apex Bank chairman-in a sawi chu thudik lo a ni tih an sawi.
Mizoram Cooperative Siamtha Pawl (MCSP) inti hian thuchhuah siamin, MCAB Ltd chairman T Lalmuanpuii’n kum 2016-ah tawh Cooperative Society Management Board-a a zawna term hnih awm theihna dan hi thiah ni rawh se, tiin an pass tawh,tia a sawi hi thu diklo a nih thu sawiin, cooperative society-ten Annual General Assembly-ah emaw Special General Assembly-ah emaw he thu hi an la rel ngai lo tih a sawi a. Hetiang thurel a awm leh awm loh hrechiang duh tan Cooperative Society-ten Assembly an neiha ‘meeting minutes’ RCS office-a an thehluh thin atangin a en theih tih a sawi.
‘Primary society tam berte hi society-a tui leh phur mi tlemtein an lo tundin hram hram a ni a. Chu’ng mite chu kum tam tak, an peih lo chung pawha hruaitu atana thlan loh theih lohte an ni thin. Heng mite hi tuna kan dan hman lai anga hruaitu an nih theih loh chuan society engemawzat chu ngaihtuahawm tak an ni,’ a ti.
Hei vang hian kum 10 bak a zawna hruaitua awm theih lohna dan chu kumina an inthlanna turah tlawmngaih chhuaha dawm ding hram hramtu mamawhna hmun, primary society-te tan bik chuan ngaihhnathiamna (exemption) siamsak turin sawrkarah an thlen nghe nghe tih MCSP hian a sawi a ni.
State level federation lam erawh, RTI hmanga zawhna chhanna atangin, Federation thenkhatah chuan dan palzutna leh dan loa sum hmanna tam tak hmuh chhuah a nih atangin, kum 10 bak thut theihna tur dan siam a, ‘cooling off period’ nuaibo chu kan zo lo hle tih a lang chiangah an ngai tih sawiin, MCSP chuan a zawna kum 10 bak Board-a awm theih lohna dan chu Federation ho tan tihdanglam ngaiin a hre loa, tihdanglam a nih chuan kan ram cooperative movement tan thil hlauhawm ni zawk turah a ngai tih a sawi.