Mizoram Olympic Association meeting

Mizoram Olympic Association (MOA) executive committee chu Ningani khan Ajal Club-ah hmalakna tur hrang hrangte sawiin an thukhawm.
MOA meeting chuan tunhnaia Nagaland-a zawh tak North East Games vawithumna a thlirlet a, result duhthusam ni lo mah se Mizoram thlen chinah kum dang aiin hmasawnna an hmu a, result tha a nih pawmin, Tripura-in a thlen leh tur 2025 North East Games atan an chaklohnate chu insiamthatna’n hman ni se an ti a; sports disicipline hrang hrangte pawhin result tha zawk an nei theihna turin tan lak an rel bawk.
Kumin kum tawp lama Uttarakhan thlen tur 37th National Games-ah MOA chuan player tam thei ang ber tirh theih ngei tha a ti a, hemi atan hian affiliated association tinte hnenah anmahni discipline theuha National Games an qualify theih tura tan la turin hmalakpui ni se an ti bawk.
MOA chuan kumtina urhsun taka a lawm thin Olympic Day – June ni 23 chu urhsun leh ropui taka lawm tha a ti bawk a; Indian Olympic Association-in a duh dan angin Olympic Day Run buatsaih leh an tum a; hei bakah hian Day puala programme hrang hrang buatsaih an tum , ruahmanna lo siam turin senior vice president F. Lalnienga kaihhruainain Olympic Day Celebration Committee din a ni.
Meeting hi MOA president Robert Romawia Royte-in a kaihruai a, secretary general V. Lalzawmliana’n hmalakna report pein, OB bakah member an kokim hle a ni.