Mizoram Police-in lirthei 219 nei thar PS leh outpost-in an dawng vek dawn

Assistance to State and UT for Modernization of Police (ASUMP) Scheme 2025– 2026 hnuaia lei police lirthei thar chu Ningani khan chief minister Lalduhoma’n Ningani khan 3rd Battalion MAP Parade Ground Mualpuiah a vailiam. ASUMP Scheme 2025- 2026 hnuaiah hian sawrkar laipui Ministry of Home Affairs-a High Power Committee chuan Mizoram Police-in tha taka hna an thawh theihna tur leh mipui rawngbawlna kawnga an tha tihchakna atan lirthei 219 lei a lo pawmpui tawh a. Tunah hian a vaiin a la rawn thleng kim lo deuh.
Mizorama police station zawng zawng (44) ten a thar pakhat tal an dawng vek dawn a. Chumi zarah chuan outpost 15 pawhin lirthei an kawl theih phah dawn a ni. Battalion, specialised unit leh Police Training School pawhin an dawng ang.
Chief minister chuan sawrkar laipui scheme – ASUMP atanga an fund hmuh zawng zawng hi state share nen cheng vaibelchhe 44.53 a ni a, heng zinga vbch. 30.45 hi lirthei leina atan bika hman niin, a dang hi police thuamchakna hmanraw thar dang leina atan hman a ni tih a sawi.
Kum 2017 atang khan ASUMP atanga lirthei lam chi lei hi sawrkar laipuiin a khap a. Kan state police-ten lirthei lamah harsatna an tawk chho a. Assembly House-ah pawh sawirik a ni thin tih sawiin, “Kan mamawh zia uar taka sawi chungin, nikum khan action plan kan thehlut a. Kan DGP Sharad Agarwal hian theihtawp chhuahin a bawhzui a. Hun rei tak an lo phal tawh loh thil kha min rawn phalsak ta a ni,” a ti.
Technical thila harsatna kan neih avangin Police Modernisation Scheme hi kum 2021 atang khan Mizoram-in a dawng tawh lo a. Sawrkarna an chelh hnua an hmu leh ta chu a lawmawm tih sawiin, Home minister leh a thawhpuite chungah an lawm hle tih a sawi a ni.
Home minister K Sapdanga pawhin, Mizoram Police thawhrimnaah lawmthu a sawi a. Lirthei tharin an nitin hnaah awlsamna tam tak a thlen a beisei tih sawiin, “Kan police-te thuam chak hi kan ram himna thuam chakna leh khawtlang nuam neihna a ni tih kan hria a. Thuam chak zel kan tum a ni,” a ti.
DGP Mizoram Sharad Agarwal chuan lirthei thar neih duhna ngawr ngawra he hmalakna hi kalpui an ni loa, hnathawh tha zawk an neih theihna atana inthuamchakna, tunlai changkanna umpha tura inbuatsaihna a ni tih a sawi.
8 Police lirthei thuamthatna (modernization) atan hian cheng vaibelchhe 33.83 ruahman a ni a, central share cheng vaibelchhe 30.45, state share vbch. 3.38 a ni
8 Lirthei thar lei ho chu:
1. eco-friendly electric scooter 15 leh motorcycle (160 cc) 21
2. LMV 96 – Scorpio N (4×4), Bolero Neo, Bolero B6, leh Bolero Camper
3. HMV 18, MMV 30 leh MMV bus 24 (bus hi dawn belh leh tur)
4. Water tanker 5, prison van 3 leh Z+ category VVIP security duty atan bullet-resistant Toyota Fortuner 3
5. Traffic leh tul danga hman turin lirthei hnuhna (towing truck) 4
8 Lirthei tharte hi hetiang hian ram chhung hmun hrang hrangah sem zai a ni ang:
1. Mizoram-a police station awm zawng zawng 44-in LMV thar an dawng vek ang
2. Police Outpost awm zawng zawng 15-in LMV pakhat tal an dawng ang
3. Armed Police Battalions, Specialized Units, District Executive Forces leh Police Training School hnenah pek a ni ang
4. Towing truck pali hi Traffic Police leh District Executive Forces (DEFs) hnenah pek an ni ang.
8 State Action Plan 2025- 2026 hnuaiah Mizoram-in sum a dawn chu: central share – vbch. 39.37, state share – vbch. 4.50, a vaiin – vbch. 43.87
8 Heng sum hi heng hmanraw hrang hrang – security equipment, smart policing, forensic leh mobility assets (lirthei) atan hman a ni