Mizoram state mil turin ruihhlo khuahkhirhna dan duang dawn
Mizoram state mil turin ruihhlo
khuahkhirhna dan duang dawn
Ruihhlo khuahkhirhna dan hman mek chu Mizoram mil tura hman remchang tawk lo a awm thin avangin, state chhung bika hman atan dan duan tum a ni a, a duangtu tur din a ni.
Mizoram State Core Committee on Ruihhlo Do chu an chairman, chief minister Lalduhoma kaihhruaiin Thawhlehni khan an thukhawm a. Ruihhlo hluar zel tur venna atan leh hemi lama inhnamhnawihte hrem kawngah, dan hman mek chu Mizoram mila siamthat tul an ti a. Dan hmanga khuahkhirhna Mizoram state mil duangtu tur an din.
Excise & Narcotics Department, Police Department, Social Welfare Department leh Central YMA atangin hma an lakna an report a. Excise & Narcotics hmuh danin Operation Jericho kalpui hnuah nasa takin ruihhlo tawlhruk a tlem a, a man pawh a to chho a, khuh damdawi thlengin a man hi a sang tawh tih sawi a ni.
Police Department chuan kum 2025 khan ruihhlo case 319 an ziaklut a, mi 483 an man. Kuminah June thleng khan case 219 an ziaklut tawh a, a kaihhnawih mi 312 an man tawh. Case ziahluh leh mihring man zat a pun chhan hi, kum hmasa lamah khan ruihhlo hi a hlawm lian deuhin an tawlhru thin a, kumin atang hian tlem tham te tein mi tam zawkin an tawlhru nia hriat a ni. Police hian hmanraw tha zawk nena a do hna an thawh tak avangin a tawlhrutute hi an man tam ve tial tial tih an sawi.
Social Welfare Department report danin, Hulhhliap Short Stay Centre kalpui tawh zawng zawng enlet atangin, heta lut zaa 30-in ruihhlo an sim hlen a, mi 198 chu skill training chi hrang hrang 13 pek an ni a, an zinga 21 chu Bana Kaih CM Special Package pek an ni. Hulhhliapah hian sawrkar chuan mi pakhat enkawlna atan Rs. 15422 seng zel anga chhut a ni.
Central YMA chuan Anti Drugs Squad hmanga hma an lakna leh Operation Jericho an kalpui dan an report a, hnathawhna atan lirthei engemawzat an neih chu an tangkaipui tih an sawi. Sawrkar puihnain Central YMA hian TBCC-ah ruihhlo ngai enkawlna an sak belh mek a ni.
Heroin a tlem a, a man a lo to tak hnu hian ganja a lo hluar ta hle a, hmeichhe naupang pawhin an zu niin thutkhawmah hian sawi a ni a. Chutiangin khuh damdawi pawh a hluar chho mek tih sawi a ni bawk.
Naupang hnenah ruihhlo ti lo tura zirtirna hi ‘mission’ mumal tak anga School Education Department leh kohhran hrang hrang hmanga kalpui a tul hle nia ngaih a ni a. Court-a thuhretute kal man pek thin chu awlsam zawka kalpui a nih theihnan IFMIS paltlang lo (exemption) tura tih a ni. Veng leh khaw tina ruihhlo dotu pawl nung tak din dan ngaihtuah an remti bawk.
Chief minister hian ruihhlo do kawnga hmalatu department leh tlawmngai pawl chungah lawmthu a sawi a. Tunah hian ruihhlo hi do rem vek lo mah se, hma an lakna hi a sawt hle nia hmuh theih a ni tih a sawi. Thutkhawmah hian Home minister K Sapdanga leh Excise & Narcotics minister Lalnghinglova Hmar bakah member-te an tel a ni.