Mizoram State Pool 9 & 10 Ball Championship

March ni 4, 2024 atanga khelh tan Mizoram State Pool 9 & 10 Ball Championship 2024 chu khelh chhunzawm zel niin, March ni 30, karleh Inrinni hian a hmawr bawk a ni ang.
Mizoram Snooker & BIlliards (MSBA) buatsaih championship 9 Ball quarter-final-ah T. Laltlansanga (Lunglei) leh Christopher Zohmingliana (Khatla East) intumin, semi-fial luh inchuh ve dangte chu T. Laltanpuia (Upper Republic) vs Lalsangzela (Khatla South), PB Liansangzuala (Dawrpui) vs Zonuntluanga (Electric Veng) leh Zoramliana (Bethlehem Veng) vs Lalchhandama (Dinthar)-te an ni a, quarter-final hi race to 6-a khelh a ni.
PB Liansangzuala hian Zonuntluanga (Tekawka) lakah 6-2 hneh changin semi-final a inhlangkai tawh a; T. Laltlansanga’n Christopher Zohmingliana lakah 6-2 hneh sualchhuakin last four a lut bawk.
Quarter-final inkhel dangah T. Laltanpuia leh Lalsangzelate’n inkhel hmuhnawm entirin, Lalsangzela chuan 6-4-in hnehna a chang a; Lalchhandama leh Zoramliana inkhelah Chhandama’n 6-4 hnehna nen semi-final a lut ve bawk.
Semi-final pawh khelh tawh niin, match hmasa zawkah PB Liansangzuala leh T. Laltlansanga an intum a; semi-final match hnuhnung zawkah Lalsangzela leh Lalchhandama an inhmachhawn ve thung.
PB Liansangzuala leh T. Laltlansangate inkhelah hian match rukna thleng velah chuan frame an inlakchhawk zak zak a, a hnu lamah erawh Laltlansanga hian frame a la zawn ta a, 7-3 hnehna nen final a inhawlh tling.
Semi-final match hnuhnung zawka Lalsangzela leh Lalchhandamate inkhelah erawh Sangzela’n frame nga (5) a lak zawn hnuah Chhandama rawn thochhuak chuan frame khat a rawn la a, mahse, Lalsangzela’n lehthal lehin 7-1 hnehna nen final a inhlangkai ta zawk a ni.
Pool 10 Ball khelh tan leh a ni a; Pool 9 Ball & 10 Ball hi a rualin final khelh a ni ang.