Zion Lalremruata
Former Gen. Secretary,
AMFU Gen.Hqrs
-- Advertisement --
Mizorama Kuthnathawktute(Farmers) hi enge an mamawh ber tiin zawt ta hlawm ila, an mi chhanna chu an tharchhuah hrang hrangte dehralna/sumdawnna tha leh mumal an mamawh thuin min chhang hmasa ngei ang. A hralhna lam hi a pawimawhzia hriain British India hunlai daih tawh khan Royal Commission on Agriculture chuan kum 1928 khan India rama Agriculture Policy pawimawh tak mai hetiang hian a lo siam daih tawh a, “India ram kuthnathawktute tan leh ram economy dinchhuahna tur chuan an thar chhuahte a hralhna lam ngaihtuah hmasak a, chumi hnuah a market/a hralhna azira tharchhuah lamah hmalak tur a ni” a lo ti daih tawh a ni. Dstrict Council kan nih atanga vawiin hun thleng hian kuthnathawktute tana tangkai ber tur leh ram leh hnam hmasawnna tura a ki pawimawh ber zinga mi kuthnathawktute tharchhuah hrang hrang dehralna kalphung tha leh mumal hi kan la nei ngai lo va; an lainatawm tak meuh meuh a ni. Hetiang a nih mek lai hian kan ram hruaitu thenkhat lah chuan puhmawh tur dang zawngin kan la thar tam tawk lo an ti teh fo va, hei hi thu dik chanve chauh a ni!
Hunte a kal zel a, tunhma ai chuan kawng hrang hrangah hmasawnna neiin kan ram hruaitute pawn ngaihtuahna nasa zawk an seng chho ta zel a, kuthnathawktute tharchhuah dehralna lam pawhin ngaihpawimawh a hlawh chho ta tulh tulh hi thil lawmawm tak a ni. District Council kan nih lai khan heng dan pahnihte ‘The Mizoram District(Market) Regulation of 1954’ leh ‘The MizoramDistrict (Market) Rules of 1956’ hi siam a ni a, hman tangkai a ni vak lo. State kan nih hnuin dan dang- The Mizoram Agricultural Produces (Restriction on Movement) Order, 1994 leh The Mizoram Agriculture Products(Prohibition of Movement)(Amendment) Order,1999 te hi siam leh a ni a, hei pawh hi a tangkai dan a nep viau. Tichuan, Agriculture Produce Marketing Committee Act 2003 (APMC Act 2003) tlawh chhanin Regulated Market siamna tur The Mizoram State Agricultural Produce Marketing (Development and Regulation) Act, 2008 chu kum 2008 chawhma lam khan siam leh a ni a mahse, he dan hi hman lohvin a hlamzuih ta a ni!
India rama mi thiam zawkte ngaihtuah chhuah APMC Act 2003 (hei hi UPA te kutchhuak a ni) hnuaiah hian Regulated Market(Mandi) din tur a ni a, he dan hi siam anih atangin State tam takin an kalpui nghal a; kuthnathawktute pawn an chhawr chho viau a ni. He Regulated Market kalphungah chuan State level Marketing Board siam tur a ni a, he tah hian sawrkar lam aiawh te, a kaihhnawih Deptt te, kuthnathawktu aiawh te, sumdawng aiawh te leh Consumers aiawh te an tel thin a ni. An ni hian ram chhung dinhmun hrang hrangte enin Kuthnathawktute tharchhuah hrang hrang man a hniam lam/minimum price an bithliah thin ang a, a tul dan azirin sumdawnna kal vel an endik tur a ni. Regulated Market lo pian chhan ber chu Kuthnathawktute thil tharchhuah hrang hrangte kharchhawng/sumdawng hovin an khuahkhirh/control vang a ni a, thil man a to bakah a hlawkna tam zawk an tel vangin a thartu Kuthnathawktute chu chan chhe zawkah an awm thin a; hetiang dinhmun hrisel lo tak atanga Kuthnathawktute khaichhuah hi Regulated Market thil tum ber chu a ni. A tawi zawngin kuthnathawktute, kharchhawngte leh mipui/consumers-te lungawi tlanna tur market hrisel tak din pawh kan ti thei ang chu.
APMC Act 2003 hi kalpui a nih mek laiin tuna Sawrkar laipuia sawrkarna chelhtu NDA chuan Agriculture Produce and Livestock Marketing (Promotion and Facilitation)Act 2017(APLM Act 2017) hmangin an lo siam danglam chho va. He APLM Act 2017 hi APMC Act 2003 laka a danglamna chu ransa telh belh a nih bakah mimal/private in Regulated Market a kalpui theihna lai hi a ni. Agriculture Subject hi State te thuneihna a nih avangin APMC Act 2003 la hmang State an awm a, State thenkhatin APLM Act 2017 hi an hmang bawk a ni. A nihna takah phei chuan kuthnathawktute tharchhuah hmanga sumdawnna hi a buaithlakin risk a sang em em a; tihtak zeta hmalak ngai chi a ni. A chunga kan tarlan tak atang khian kan hre thei ang a, Mizoram chu ram chhunga kharchhawng/sumdawng ho bakah heng Bagha-Silchar-Karimganj Syndicate ten min thunun hneh hle mai a, kuthnathawh lam chawisan pawh thil har a nih phah hial kan ti thei ang chu.
Heng APMC leh APLM te kalpui a nih mek laiin India ramah Farm Laws 2020 chu hnawhsarum takin kum 2020 khan Ordinance hmangin Sawrkar laipui chuan a siam rup mai a, hemi duhlo hian India rama kuthnathawktu pawl hrang hrangten nasa takin an dodal a nunna chan pawh an awm nual nghe nghe; Supreme Court hial a inrawlh ta a, vawiin thleng pawh hian za ah za chuan ala fel zan lo a ni. Kan hriat angin khawvelah Democracy ram lian ber kan ni a, Democracy hi thatna tam taka wm bawk mahse a leh lam pangah chuan harsatna tam tak hi a keng tel a; tuna kan sawi mek APMC leh APLM dante pawh hi party inchirh thehnan an hmang a buaithlak ve tak chu a ni.
Zoram People Movement chuan Kal Phung Thar tiamin hneh takin sawrkarna an la a, anni hian kuthnathawktute tharchhuah hrlahna tur sum Budget-a DAH chu zuarin an auhla ber a ni a. Tichuan, an sawi thin angin Aieng, Hmarcha, Hmunphiah leh Sawhthing tana Price Support siam nan sum tam tak an ruahman a. Media/Press mite Dt 26th,June,2024-a an kawmnaah Pu PC.Vanlalruata, Minister of Agriculture, I&WRD, Co-Ope. chuan Regulated Market din tura Sawrkarin chak taka hma a lak mek thu a sawi a; a sawi ang ngeiin chak taka hmalakna kalpui nghal a ni ta! Pu Lalduhoma Chief Minister hian tunhma atanga alo sawi leh vei em em thlai thar hralhna tur chu a ngai pawimawh hle a ni tih a lang chho zel hi thil lawmawm tak a ni!
Regulated Market kan neih theih nana Dt 28th, Sept,2018-a “Kuthnathawktute Chhanchhuahna Kawngzawh” Aizawl khawpuia kan neih laite min hriat chhuah tir a, Kuthnathawktute mamawh ber mai kan rama thil tharte dehralna tur kalpui ngam Sawrkar kan nei hi thil lawmawm tak a va ni em. Hemi kawngah hian rilru leh ngaihtuahna thiang tak hmanga party politics chhia dah tha a kan ram economy chawisang turin Mizoram chhunga Kuthnathawktuten kan puan ven i sawi chhing ang u.