Mizorama football khelmual tha ber Durtlang-ah hawng

Mizorama football khelmual
tha ber Durtlang-ah hawng
Aizawl Smart City Limited hmalaknaa din Durtlang Football Stadium, cheng vaibelchhe 22.3 hu chu Urban Development & Poverty Alleviation minister K Sapdanga’n Thawhlehni khan a hawng.
UD&PA minister chuan, he stadium saknaah hian sawrkar hmasate sulhnu chhuiin an hniakhnung an zui, tiin sawrkar kaltate a fak a; Mizorama football khelmual tha ber hawn a ni ta chu lawmawm a tih thu sawiin, a panna kawng tur pawh ngaihtuah mek a ni tih a sawi.
Bawngkawn leh Durtlang inkarah kawng tha leh changkang tak, complete street design duan vek a ni tawh a. Sum pawhin a hmuak ran tawh tih a sawi a ni.
“Tun atanga kum 5-ah chuan Mizo tlangvalte hian Delhi, Chennai, Mumbai-ah leh national level inkhelhnaah an pet goal fo tur a ni. Chu chu kan beisei let dawn cheu a ni,” tiin, Mizo thalaite chu he stadium hi hmang tangkai turin a chah bawk.
ASCL chief executive officer CC Lalchhuangkima sawi danin, Durtlang Football Stadium sakna atan hian a pumpuiah Rs. 22,30, 75,000 sen a ni a, sawrkar laipuia Smart City Mission atangin Rs. 20,07, 67,500 hmuh niin, state sawrkarin Rs. 2,23, 07,500 a tum ve a ni. A satu atan M/s Biakliana & Sons rawih an ni a. 2022 November 30 khan sak tan niin, kumin March 9 khan sak zawh a ni.