Mizorama hmeichhe volleyball thiam ber
Luangmual Volleyball Club
Ningani zanah chungnung takin Kanan lakah 3-0-in hnehna an chang a, Tata SK 712 Pro Volleyball League-ah an champion.
R. Dengthuama Indoor Stadium, Mualpuiah filawr taka inlan Nipa Barad chuan mimala amah hnaih ber aiin point 21-in a hmu tam a, 25-21, 25-12, 25-17-in Luangmual a chakpui a, Luangmual tan kawng a awlsam tluan.
Pro Division kaithar Luangmualin season hawnna tournament-ah final an lut nghal a, mahse, ngam loh an nei. Kananin MVA Cup nen trophy pahnih an la zawn ve thung a, season kharna Mizoram inelna sang berah rin an hlawh.
Pro Volleyball-a an tel hmasak berah Luangmualin champion nghal an duh tak zet tih an lantir a, Mizoram pawn atanga player lalut awmchhun niin, Gujarat atangin beach volleyball-a hnuhma nei tha tleirawl Nipa an chawlut.
Kum 18 mi, feet 5 leh inchi 9-a sang hian thla tharah India volleyball camp a zawm dawn. Mizo leilungah inbuatsaihna hun duhawm hmangin, vawi sarih a khelhah point 196 hmuin 92 a hloh a, spiker tha ber chawi-mawina dawn bakah a team-te’n a laka beisei an neih tihlawhtlingin a chakpui vek.
Final-ah Nipa hian point 30 hmuin 14 a hloh a, a kawppui Lalmuanpuii chu amah hnaih ber niin vawi kua vaw tlain tum li a tisual. Kolasib nula hian a pumpuiah Luangmual tan point 90 thawkchhuakin 37 a paih a, Nipa el thei ber a ni tel bawk.
Lalramliani’n tum kua vaw tlain R. Laltleipuii’n point riat a hmuh zat chiah a hloh ve thung. Championship chhungin Kanan innghahna pahnih Tleipuii’n point 67 leh Rami’n 59 an hlawhchhuak a, danglamna siam kawngah an elpui Nipa leh Muani an khan lo viau a ni.
June ni 22 khan league-a sang ber nih inchuhin hmeichhe team tha pahnih hi an inkhel tawh a; set hmasa ber an lak hnuah season kal meka a vawikhatna’n Kanan an tlawm a, an intawn nawn lehnaah a hma aia chiangin Luangmual an chak a, phu takin an champion.
Set khatnaah D3 Business Player of the Match lawmman dawngtu Nipa chuan vaw tla zawn chho nghalin 5-0-in an sang. An tlawm tawhna chhanlet tumin Kanan an insawrbing nasa a, Lalramliani’n a hlap tlak rualin 16-16-in an nih rual.
F. Lallianchhungi’n ball tha taka a siamsak hmangin Gujarat tleirawl chuan vawi li a vaw tla zawn a, 21-17-a sang zawk an nih leh hnuah Luangmual tan kawng a awlsam. Nipa dan tuma Kanan inbuatsaihna a hlawhtlin zawh loh mai bakah, set hnihna atangin Muani leh R. Malsawmtluangi’n Luangmual an tanpui tel bawk.
Set hnih an hloh zawn hnuah Rami leh Tleipuii’n Kanan tanhmun siamthain 9-6-in hma an hruai hman a, mahse, Kolasib spiker Muani’n point thum hmu zawnin Luangmualin an lehpel zui a, inthlau loin an inum chho.
Dawrpui Vengthar nula Rami’n a vuak tlak rualin Kananin an nih rual ve leh a; set hmasa ber ang thoin 16-16 a nih laiin Nipa chuan Luangmual kal falpui lehin, point ruk an hmu zawn a, 22-16 a nih hnuah lehlamin point khat chiah an hmuh belh.
Luangmual insensona a thlawn lo a, Pro Volleyball-a an tel vawikhatnaah an hlawhtling nghal. Power Department Sporting Club, Durtlang leh Bethlehem Vengthlang hnung zuiin champion thei palina an ni a, Kananin a vawikhatna’na champion an tumna bakah trophy pathum nena season khar an tumna an tihlawhtling zo ta lo.
Final zana khuallian Dr. Lalmalsawma Nghaka (Sponsor, President – Mizoram Volleyball Association, Vice President – Volleyball Federation of India) chuan thu sawiin, “National leh international thlenga Mizo player-te an tel theih hi Mizoram volleyball chuan a duh a; kan hruaitute nen kan inrawn tlang ang a, international-a tawnhriat nei tawhte chahlutin, player, referee leh coach-te’n training tha an neih theihna tur buatsaih dan kawng kan zawng dawn a, senso ka tum vek ang.
“Season thar lo awm turah hian Mizoram volleyball calendar-a awmsa angin September thla chho velah Inter Village Tournament buatsaih turin ruahmanna a awm a, lo inring lawk turin khua leh veng hrang hrang ka sawm che u a ni.
“Mizoram Volleyball Association vul zel rawh se,” tiin Mizoram volleyball tana thu lawmawm a puang.
Tarlan tawh thin angin, nizan result tarlan hman lohah Thutak Nunpuitu Team leh Huntharin mipa final an khel.
-- Advertisement --
Hmeichhe lawmman
Champion : Luangmual
Pahnihna : Kanan
KT Enterprise Best Spiker
– Nipa Barad (Luangmual)
KT Enterprise Best Setter
– F Lallianchhungi (Luangmual)
KT Enterprise Best Receiver
– Esther Hmingthansangi (Kanan)
KT Enterprise Best Coach
– Lalrova (Luangmual)
PRO VOLLEYBALL LEAGUE
HMEICHHE CHAMPION
2017 – Power Department Sporting Club
2019 – Durtlang
2022 – Bethlehem Vengthlang
2023 – Luangmual