Mizoramah lirthei pung chak Kuminah two wheeler taxi thar 170 chuang

Lirthei a pung chak a, kuminah pawh a pung reng. September thla thlenga Mizorama lirthei awm zat atanga chhutin, Mizoramah mi 2.6-in lirthei pakhat an intawm zel ang a ni.
Lirtheiah hian a tam ber chu two wheeler a ni a, two wheeler taxi thar pawh kuminah September thla thleng khan 170 chuang a awm tawh.
Transport department-ah lirthei 4,19,255 ziahluh a ni tawh a, chhiarpui hnuhnung bera (2011) Mizorama mihring awm zat (1,091,014) atanga chhutin, mi 2.6 zelin lirthei pakhat an intawm ang a ni. August ni 20 thleng khan lirthei hi 4,15,655 a awm a, mi pathum zelin lirthei pakhat an intawm ang a ni. Chumi hnuah chuan lirthei a pung leh viau tawh tih a lang.
Chhiarpui hnuhnung ber hi a rei tawh a, tuna Mizoram mihring awm zat dik tak atanga chhut chuan lirthei pakhat intawmtu zat pawh hi a danglam ang.
Kuminah September thla thleng khan lirthei thar 22,182 a awm tawh a, 2024-ah khan 30,019 a awm.
Kumina lirthei tharah two wheeler a tam lawrlak a, two wheeler mimal ta 17,042 a thar a awm tawh.
Two wheeler taxi thar pawh kuminah 178 a awm tawh a, three wheeler (auto rickshaw) pawh a thar 59 a awm tawh.
January-ah 2403
February-ah 2191
March-ah 2569
April-ah 2876
May-ah 2539
June-ah 2333
July-ah 2515
August-ah 2302
September-ah 2595