Mizoramah mipa hockey tan kawl a eng dawn ta!

Mizoramah mipa hockey tan kawl a eng dawn ta!
Mizoram hmeichhe hockey player-te’n India team-ah hmun lailum an chang chho ta reng a, hockey player-te tana hna petu hlawm lian zinga mi Indian Railways lamah pawh kan nulate an inhnimphum zawih zawih a, chutih laiin mipa hockey player-te thawm a reh Thiap reng a, national team lamah Mizo mipa hming hmuh tur a awm ngai lo a, he’ngte avang hian Mizoramah mipa hockey chawisang turin ruahmanna kalpui a ni dawn a, chu mi atana pawimawh hmasa academy thar hawn a ni dawn.
State sawrkar chuan Thenzawlah women’s hockey academy changtlung tak kalpui mekin, he hmun aTang hian Lalremsiami Hmar hma leh hnu lamah hmeichhe hockey player Tha an chhuak mawlh mawlh a, chuti ang chiah chu Mizoram sawrkarin men’s hockey academy thar a din dawn a; tunhma lama Mizoram game pui ber tih hial Thin hockey game chawinun thar zelna atan state chhunga hockey hmunhma siam belh leh training facility Tha zawka thuam a ni dawn a, mipa naupang talent nei Thate zawnchhuaha an theihna tihpunsak tura hmalak a tel bawk.
Mizoram sawrkar chuan ‘Empowering Mizoram Sports’ programme a kalpui mek hnuaiah Mizote tana game beiseiawm zual zinga mi – hockey, badminton, archery leh wrestling zirna hmun tur additional SAI training centre hrang hrang din chhuak turin ruahmanna a siam mek a ni.
Union Sports Secretary Hari Ranjan Rao pawhin Mizorama hockey game chawikan leh tihhmasawn rawtna hi a thlawp Tha hle a, sawrkar rawtna siamte chu tihhlawhtlin ngei a nih tur thu tiamin, Mizoram hockey tlakchham lian tak training facility thuamchak kawngah a inhawng hle a ni.
Mizoram hi badminton leh football lamah pawh talent nei Tha tak kan ni a, hei hi training-na hmunhma lama a changtlun deuh bik vangte pawh a ni mai thei – hockey game-te nen khaikhinin!
Tunkar tir lam Thawhlehni khan Mizoram Sports minister Lalnghinglova Hmar chuan New Delhi-ah Union Sports Secretary Hari Ranjan Rao hi hmuin, Mizoram chhunga sports hmasawnna an sawidun tih official statement hmanga tarlan a ni.
He thuchhuahin a tarlan zel danin, mi pawimawh pahnih inkawmte hian Mizorama hockey game boruak len Thin dan leh hmeichhe hockey bik phei chuan Indian hockey-a sulhnu hraw tak a neih chhoh reng thu sawi dunin, he state-a hockey tihnun thar zel leh a bikin, mipa hockey tuaithar lam an ngaipawimawh a, state chhunga training facility tihchangtlun chu hna Tul hmasaah an ngai bawk.
Mizoram sports minister Tetea Hmar chuan Rao nena an inkawm zawhah Mizoram men’s hockey academy din chungchang sawiin, Mizo Thalaite talent haichhuahna atan tihmakmawh a nih thu leh Mizote chu kan pianphung leh nihphungah hockey man tak hnam kan nih thu a tarlang a, chutih rualin kum engemawti aTang khan he state-a hockey game tlakhniam tak tlat thu a sawi lang tel bawk.
Minister chuan, “Mizote hi hockey game-a talent nei Tha tak hnam ni mah ila engemawlai aTang khan he ramah hian hockey a dai ta tlat a ni. Hockey hi India tan pawh international medal kan lakna atana game duhawmberte zinga mi a ni,” a ti.
Serchhip district chhung Thenzawl khuaa women’s hockey academy hlawhtlinzia minister hian tarlang zui zelin, heti ang academy hi mipate tana buatsaih ve ngei chu tihmakmawh a nih thu leh Empowering Mizoram Sports programme hnuaiah discipline pali – hockey, badminton, archery leh wrestling-te tan Mizorama SAI training centre din belh rawtna sawrkar laipuia a thlen thu a tarlang tel.
Director General of SAI leh Centre hnuaia Support And Vision For Sports Development hotu lu ni bawk Hari Ranjan Rao pawhin Mizoram sports minister rawtna hi a thlawp tih a sawi a, Centre pawhin sport discipline chawikan leh vulh bik tur a thlan zingah hockey chu ngaipawimawh zinga mi a nih thu a sawi.
Rao-a hian sports tihhmasawnna tura Mizoram sawrkarin ruahmanna leh hmachhawp felfai tak a nei chu fak nghalin, Indian sports hlawhtlinna atan pawh Mizoram chu theihna (potential) nei Tha tak a nih thu a sawi.
Union Sports Secretary hian tunhnaia Mizoram badminton hmasawnna fak bawkin, football-a Mizo player-te hlawhtlinna chu infiamna dangah pawh hlanchhawn theih a beisei thu sawi chungin Mizorama sports training lam chi reng reng chu Khelo India-accredited training centre-te nena kalkawp remchang thei a nih thu a tarlang tel.