Mizoramah organic farmer chhinchhiah 27604 an awm
Mizoramah farmers producer company hrang hrang hnuaiah organic farmer 27604 an awm.
Organic Mizoram (MOM) enkawl farmers producer company (FPC) zinga organic ginger (sawhthing), organic Mizo chilli (Mizo hmarcha) leh organic turmeric (aieng) chingtu FPC ho chu Ningani khan kohkhawm an ni a. An thlai thar hralhna kawnga hma lak zui dan tur rel a ni.
Hmanpuitu adviser to chief minister (Handholding) Dr KC Lalmalsawmzauva chuan loneitute zingah sawrkar puihna dawn chhunga nung, sawrkar atanga puihna a tawp ruala tawp ve mai an awm thin tih a sawi a. Party hrang hrangin sawrkarna an siam tawh a, tuna sawrkar pawh hi hlun tur a ni lo angin a la tla ve ngei anga, chutih hunah chuan an tlak ruala loneitute kalphung dik nei tura sawrkarin a tanpui mekte chu tawp ve mai loin, kawng dik zawka an kal zel chu an duh dan leh an hmathlir a ni tih a sawi.
Agriculture & Farmers Welfare special secretary Ramdinliani pawhin organic products chu thlai dang aia hlu bik a nih angin a man pawh a to bik tur a ni a, hralh chhuah kawngah pawh FPC-te inlungrual a tul tih a sawi.
8 Kum 2016 khan Mission Organic Value Chain Development for North Eastern Region scheme kaltlangin Mizoramah Mission Organic Mizoram hi Agriculture & Farmers Welfare department hnuaiah din a ni.
8 Tunah hian Mizoram district hrang hrangah MOM hnuaia loneitute tan hma lak niin, tehfung khauh tak nen organic certificate pekchhuah thin a ni.
8 MOM hnuaiah hian phase 4-na kalpui mek a ni a, FPC 41 an awm. Organic farmer 27604-in ram hectare 26500 a zau an nei.
8 Mizoram district hrang hrangah bawrhsap kaihhruaiin District Level Monitoring Committee din a ni a. Organic thlai chingtute hmalakna leh hmasawn zel dan tur enho a, ngaihtuah zui thin a ni.
8 Thlai thar chhuahte seng leh sawngbawl kawnga pui tura hmalakna atan FPC-te hi post harvest infrastructure ngaihtuahpui an ni a. Chu’ng atan chuan Collection Centre 26 din ni tawhin, Integrated Pack House 15, small processing unit 1 leh transport vehicle 11 pek chhuah a ni tawh.