TB (Tuberculosis) vei zinga enkawl lai, harsatna avanga chaw tha ei pha lo ten chaw tha an dawn theih nana tanpuitu (doners) 61 an awm tawh a, TB vei 120 ten he tanpuina hi an dawng mek.
National TB Elimination Programme, National Health Mission Mizoram hotute sawi danin, nikum chhung khan TB vei mi 2084 hmuhchhuah an ni a. Heng zinga 59 chu TB vang hian an thi. Thi zinga 28 hi Aizawl district ami an ni.
TB vei hmuhchhuah 2084 zinga 388 hi private atanga hmuhchhuah an ni a. TB vei hmuhchhuah zinga 333 hi HIV positive an ni tel tih hmuhchhuah a ni. TB – HIV veite hi TB vei zawng zawng atanga zaa 15 an ni. Mi 103 chu TB pangngai aia tihdam harsa, MDR-TB (multi drug resistant) an vei tih hmuhchhuah a ni bawk. TB vei zaa 86 chu enkawl dam an ni a, MDR-TB vei enkawl dam hi zaa 72 ani
-- Advertisement --
TB test-ah hian HIV vei, zunthlum nei, zuk leh hmuam, zu inmiten TB an vei awlsam bik avangin screen nghal vek thin an ni.
TB vei hmuhchhuah hi Aizawl district-ah tam berin mi 1354 an ni a. Lunglei district-in dawtin mi 158 hmuhchhuah an ni. Kolasib ah mi 145 an ni a; Mamit district-ah tlem berin 29 hmuhchhuah an ni. Serchhip ah mi 58 hmuhchhuah an ni bawk.
Pradhan Mantri TB Mukt Bharat Abhiyan – Community support to TB patients hnuaia TB vei damlote vantlang atanga chawtha hmanga tanpuitu, doners 61 an awm tawh a. TB vei damlo 120 ten heng tanpuina hi an dawng mek. TB vei tanpui ngai zat hi mi 1000 chuang an la awm a ni.
Pradhan Mantri TB Mukt Bharat Abhiyan hi sawrkar laipui scheme a ni a. Kum 2025-a India ram atanga TB umbo tumna kawng pakhat a ni. Hetah hian TB veite chu mimal, NGO, institution leh adt tute pawhin chaw tha hmangin thla 6 emaw kum 3 thleng tanpui theih a ni a, duh zat zat tanpui theih a ni.
TB vei tam tak hi chhungkaw harsa tak tak te an ni a. An inenkawl chhung a rei a, thla engemaw zat damdawi chi tam tak an ei a ngai a. Hei vang hian an hriselna te, eizawnna leh sum leh pai dinhmun ten a tuar em em a. Chaw tha an mahmawhna a nasa hle tih National TB Elimination Programme hotute hian an sawi a. Chaw tha hmanga tanpui an nih chuan nasa takin an dam theih nan a pui dawn tih sawiin, mi inphalte chu TB vei damlo tan doner ni ve turin an sawm a ni.