Mizoramah VBG RAM G hmang tan dawn

Mizoram sawrkar Rural Development & Administrative Department (RD&AD) buatsaihin Viksit Bharat – Guarantee for Rozgar and Ajeevika Mission (Gramin) – VBG RAM G chu Nilaini khan Mizorama hman tan turin RD&A minister Prof Lalnilawma’n a hawng.
Minister chuan, mipuiin ni 100 inhlawhna kha an hmang tangkai tih a sawi a. VB-G RAM G pawh Mizoram sawrkarin a hlawhtlin theihnan theihtawp a chhuah a, India ram pumah a scheme notification chhuah hmasa ber chu RD&AD Mizoram a ni, tiin, state sawrkarin VB-G RAM G a tum ve tur cheng vaibelchhe 128 pawh chief minister leh Finance department lamin ngaipawimawhin, sum lamah harsatna a awm dawn lo tih a sawi. A hlawhtlinna tak tak erawh mipui, village council leh sawrkar official-te thawhhonaah a innghat dawn tih a sawi a ni.
India-in zalenna a neih kum 100 a tlin lawmna kum 2047-ah chuan India chu ‘developed country’ a hlankai tum a ni tih a sawi a. MGNREGA scheme-ah chuan ni 100 inhlawhna leh community assets din a ngaipawimawh a. VB-G RAM G erawh chuan kum 2047-a ram changkanga India hlang tura ruahmanna a siamah mipuiin mawhphurhna kan nei dawn tih a sawi.
VB-G RAM G scheme-in a ngaihpawimawh pakhat chu, tui hnianghnar taka neih (water security) a ni tih PHE minister ni bawk Prof Lalnilawma hian sawiin, “PHED nen tangdunin tuikhuah rintlak tak siam tum a ni a. India leh Israel sawrkar tangdunin Mizoramah tui hnianghnar taka a awm zel theihnan hma lak mek a ni. He scheme thar hnuaia ni 125 inhlawhna hi mipui eizawnna nen inkungkaih tlat a ni a, department dang nen tangtlangin changtlung zawk eizawnna duang tura hma lak a ni,” a ti.
VB-G RAM G-in a tum pakhat chu, khawtlang tih hmasawn a ni, tiin, khawtlang leh mimalah theuh hmasawnna a thlen chuan Viksit Bharat hi kan thleng thei dawn tih minister hian a sawi a ni.
RD&A commissioner & secretary R Zarzosanga chuan, VB-G RAM G scheme chu kum 2005-a hman tan MGNREGA thlakna atan sawrkar laipuiin kumin July 1-a hman tan tura a duan a ni a. VB-G RAM G hnuaiah ni 125 inhlawhna siam a ni dawn a, kum khat chhungin ni 60 farming season-ah chawlh siam a ni anga, he scheme thar hi thingtlang lama eizawnna siamtu pawimawh tak a ni zel dawn tih a sawi.
India ram puma hman thin MGNREGA chu kum 20 chuang hman a nih hnuah, India rama thingtlang khuate kum 20 hmalama an mamawh thin a lo danglam tawh a, chumi mil tur chuan VB-G RAM G hi duan a ni.
8 Mizoramah MGNREGA hnuaiah mipui an thawk tha tih sawi a ni a. Kum 2011-a poverty level 23% ni thin kha, kum 2026-ah chuan 11% ah a tlahniam tawh. Heng hmasawnna hi VC-te, RD&AD a thawktute leh mipui thawhhona avang a ni tih department hotute chuan an sawi.
8 VB-G RAM G hnuaiah sawrkar laipui atangin Mizorama hman tur cheng vaibelchhe 611.65 leh state sawrkar atangin cheng vaibelchhe 67.95 dah a ni.
8 He scheme hi India rama thingtlang zawk (rural area) hmasawnna atana duan niin, India sawrkar chuan 2026 May 11 khan Viksit Bharat – Guarantee for Rozgar and Ajeevika Mission (Gramin) Act 2025 chu ram pumah 2026 July 1 atanga hman tan turin a puang.
8 VB–G RAM G Act hman ni atangin kum 2005-a siam Mahatma Gandhi National Rural Employment Guarantee Act (MGNREGA) chu thiah (repeal) nghal a ni a. Hei hian India rama thingtlangah hmasawnna tura ruahmanna hman thin chu thlakthlengin, India-in ram changkang zinga inhlankai tuma hma a lakna Viksit Bharat @2047 vision peng pawimawh pakhat a ni.