Mizoramin a hmuh tlem chhan hi eng nge?

SASCI hnuaia scheme pakhat – Pride of Hills: Special Development Assistance for the Hill States under SASCI hnuaiah state pakuate sum insem tur cheng vaibelchhe 25,000 atangin Mizoramin cheng vaibelchhe 100 a chang ve a, a chang tlem ber a ni.
Mizoram hian a chang tlem ber a ni satliah mai lova, state pakua zinga a chang tlem ber dawttu Sikkim hian Mizoram chanpual let 8.2 (vbch 820) zet a chang a. A chang tam ber Arunachal Pradesh chuan cheng vbch 4900 chang in, chu chu Mizoram chanpual let 49 zet a ni bawk.
Engati bik em em nge? tih loh theih a ni lova, financial management thiam avanga duhsak bik lo hlawh tawh Mizoram hian, he scheme-ah hian duhsak a hlawh lo viau ta mai hi eng nge a chhan ni ang? tih hi mipui zawhna a nih a rinawm.
Tun hnaiah MNF MLA pakhat chuan Mizoram sawrkar hnuaiah SASCI sum cheng nuai sing thum chuang a lapse tih thu a lo auchhuahpui tawh a. Sum ti lapse-tu sawrkar hi a scheme/ project enkawltu leh neitu ministry-in an hua-in an hmu hniam hle tih sawiin, Finance ministry hian Mizoram sawrkar chet chhiatna a hai lo a; a hrek ta hial a ni tih chu, kum 2026- 2027 atana ‘Hill states’ bik tana sum a pek atang hian a chiang hle, tiin a lo sawi tawh a. Opposition party pakhatin he scheme hnuaia Mizoramin sum a hmuh tlem bik chhan a sawi hi rorel lai party hian an la rawn sawifiah ve turah ngai ila.
He scheme hnuaia serh hran cheng vbch 25,000 hi tehkhawng (allocation criteria) hnuaia awmze nei taka sem sawm a ni a. Chung zingah chuan, state-in eng Reforms nge a neih tih te, financial discipline a tha em tih te, project a hlawhtling tha em (project viability) tihte hi a langsar zual a nih a rinawm.
Heng tehkhawng behchhana sum hi dawng ve kan nih chuan, keimahni rau rauah hma sawn ve hle tawh angin insawi viau thin mah ila, kan thenawm state-te nena khaikhin ralah chuan kan lo la hniam hle tihna a ni ber awm e. State dangte aia kan hming a thatna eng emaw lai hi kan sawi vawng hlut thin a, ropui ta viau angin kan inngai mai ang tih te pawh a hlauhawm thei hial awm e. Tuna kan dinhmun hi in-en let nan hmangin min ti tangtu tal ni thei se, chuti zawng chuan hlawkpui tum ila a tha phian awm asin!