Mizoramin sangha a eiral zat 40% aia tlem a tharchhuak ve

Mizoramin sangha a eiral zat
40% aia tlem a tharchhuak ve
Mizoramin kum khat chhunga sangha a mamawh (ei atan) zat atanga chhutin zaa 40 tling lo chu tualchhungah a thar ve a, a bak zawng hi state pawn atanga lakluh a ni.
Larsap Hari Babu Kambhampati chuan Thawhtanni khan Raj Bhavan-ah Fisheries department hotute a kawm a. Powerpoint hmangin Fisheries department hmalakna kal mek leh Blue Economy – lui luang, dil, tuikhuah leh a dangte fisheries kaihhnawih eizawnna atana siam tura hmalakna kal mekte thlirho a ni.
Fisheries hotute report danin, Mizoramah sangha khawi theihna hmun – potential area hectare 24000 a zau a awm nia chhut a ni a. Potential area zau zawnga chhuta zaa 22.10 ah chiah sangha khawi a la ni. Sangha metric tonne 13000 bawr kumkhat chhunga kan mamawh zat niin chhut a ni a. Kum 2022 khan kumkhat chhunga sangha ei tur kan mamawh zat atanga chhuta zaa 40 aia tlem, MT 4575 vel tharchhuah a ni. Kan sangha ei zinga a tam zawk hi state pawnlam, a bikin Andhra Pradesh atanga lakluh a ni.
Fisheries department chhut danin, chhungkaw 16588 vel sangha khawi leh a chi siamna kaihhnawih thila inhnamhnawiha ngaih an ni a. Chungkaw 6283 chu sangha manin ei an zawng. Chhungkaw 11204 chu fisheries huanga ei zawng an ni a. Chhungkaw 30150 velin fishery sector atangin sum an lalut a ni.
Sawrkar enkawl fisheries demonstration farm 5 a awm a. Heng zinga thenkhat hi Fisheries department vilpuiin mimal enkawltir tum a ni tih department hotute hian an sawi. Sangha chi siamna – hatchery 9 a awm a, mimal ta vek niin, Fisheries department hnuaiah accreditation pek an ni.
State budget atangin thawktute hlawh tur deuh chiah an dawng chunga department hlawhtlinna chu fakawm a tih thu larsap hian a sawi a. Sangha khawi chu eizawnna hlawk a nih zia kuthnathawktu tam zawkin an hmelhriat theihna’n tan la turin department hotute a fuih. Sum indaihlohna avanga state atanga hnathawhna tur sum a awm loh pawhin, sangha khawiten bul tanna atana an mamawh sum hlawm, bank loan anga lak theih dan kawng dap sak tur leh hemi chungchang bank official-te sawipui turin thurawn a pe bawk.
Mizoramin kum chanve chhung eitur bak sangha a la thar lo chu tan lak zual a ngai tih sawiin, state mipui eikhawp tal chu tun atanga kum 2/3 ah chuan tharchhuah a ngai tih a sawi a ni.
Fisheries department report danin, CSS – PMMSY, RKVY, Article 275(1) hnuaia hmalakna, SASCI leh SEDP hnuaiah fishery sector tih hmasawn nan hna thawh mek a ni.