Mizoramin Union minister kan nei thei – BJP president

Lok Sabha MP inthlana BJP candidate thlan tlin chuan Mizoramin Union minister kan nei ve thei tih state BJP president Vanlalhmuaka chuan a sawi.
Thaw\annia an party office-a inkhawmah BJP Mizoram president chuan Mizoramah BJP-in MLA pahnih an nei a, sawrkarna la siam thei lo mah se, BJP MP erawh Mizoram mipui zarah nei thei ila Union minister kan nei ve thei tih a sawi.
“Mizorama sawrkar mek chu Mizote sawrkar a nih avangin, a mualpho a nih chuan kan vaia mualphona a ni a, chumi lak atanga kan him tlan theih nan leh Kristian state kan intih ang taka Mizoram atanga state dangin thil tha an hmuh a, state dangte entawntlaka kan awm theihna turin central atanga sum kan mamawh ang la chhuak thei mi kan mamawh. Chutiang ti thei tur chu BJP MP an ni a. Tun dinhmuna kan thlen chin leh kan rah chin hi chhut chiang ila, fing taka MP inthlanah vote kan thlak a ngai a ni,” a ti.
Chuti a nih loh chuan kum 5 dang chu tahna ruam leh phunchiarna ramah kan awm leh dawn tih sawiin, chutianga mipui kan phun lohna tur leh state dangten an dawn ang ‘central blessing’ tak tak kan neih ve theihnan MP inthlanah Prime minister Modi bula thu a, Mizoram mamawh sawichhuak thei tur MP thlan chhuah ngei a tul tih a sawi a ni.