MIZOTAXI

Mizoram chhunga passenger phur chi lirthei-a chuang thin te’n sorkar approved rate dik tak an chawi theihna atan Mizotaxi mobile app chu peih fel a ni ta a. State Transport Authority, Mizoram thuchhuahin a tarlan danin vawiin June ni 1, 2026 Thawhtanni atanga hman tan theih tura ruahman a ni.
Hei hi Mizorama transportation lama hmasawnna mellung chhinchhiahtlak tak a nih rualin, mipui harsatna sutkianna tha tak a nih bakah, Aizawl ti “smart city” lehzualtu tur a ni dawn a, STA lam an fakawm; a lawmawm hle. Tunhmaa taxi fare chungchanga taxi driver leh passenger-te innghirnghona thleng thin leh mipui phunnawina thleng thin ang kha a reh tawh tura ngaih leh beisei a ni.
Mizotaxi hi India ram khawpui danga Uber/Ola an hman ang deuh hi a ni mai a, sawrkar rate dik tak hman a nih tawh dawn avangin rinthua taxi driver-ten ‘chuti zat chu’ an tih ngawt ang kha a ni tawh dawn lo tihna a ni ber awm e. Kan han hmang chhin ang a, ziak leh chhiar tamna state kan ni bawk a, kan thiam leh zung zung mai ang.
Hetih lai hian, taxi driver-te hi registration tihfel nan June thla chhung hun pek an ni a; vawiin June ni 1 atanga mizotaxi app hmang nghal thei tur taxi hi an tam hman lutuk lo maithei a, sawrkar rate dik tak hman hreh avanga registration tihfel lawk duh lohte hi a awm theih ang em? tih pawh ngaihtuah theih tak a ni awm e.
Mizoram sawrkarin taxi fare a bituk hnuhnung ber kha hriat theih chinah 19.02.2024 kha a ni a. Khatah khan STA lamin taxi fare an bituk dan chuan, two wheeler tan km 1 Rs 30, a hnu lam km khat zelah Rs 20. Autorickshaw tan km 1 Rs 35; a hnu lam km khat zelah Rs 25; 4wheeler taxi tan km 1 Rs 55, a hnu lam km 1 zelah Rs 45; Maxicab tan Rs 3.50/km/ passenger for metalled road; Rs 4.00/km/passenger for un-metalled road, tih a ni.
Mizotaxi registration tifel tawhte tlan dan atangin “chumi leh chumi inkar Rs chuti zat” tih chu social media lamah a darh leh zung zungin a rinawm a. Chutiang rate hre chunga registarion la tifel ve lote taxi hmangtute leh taxi driver-te inkarah June thla chhung hi chuan inhnialna a la chhuak zauh zauhin a rinawm.
Eng pawh ni se, STA leh NIT Mizoram tawhhdunna rah duhawm tak hmangin mipui harsatna sutkian a ni tur hi a lawmawm a, Mizoramin NIT kan chhawr tangkai hi a lawmawm a, a bik takin Digiride Technology Pvt. Ltd te tan pawh hming chherna duhawm tak a nih ngei a rinawm.