MKHC-in Manipur thil thleng dem

Tunhnaia Manipur Jiribam district-a nunna in laksak bakah in leh loh leh biak in thlenga hal a ni chu an dem tih Mizoram Kohhran Hruaitute Committee chuan an sawi.
Mizoram Kohhran Hruaitute Committee (MKHC) thuchhuak chuan, Manipur buaina kalzelah tunhnaiah Jiribam district-a buaina chhuak thar lehah mi tam takin nunna chan a, in leh lo, biak in thlenga hal a, chi leh chi inkara buaina leh Kristian-te thlur bik nia lang lo chhuak thar chu pawi a tih thu a sawi.
Hetianga pawisawilote nunna inlaksak, in leh lo inhal saka inrikrapna thleng chu MKHC chuan a dem takzet, tiin, he buaina hi a reh theihna turin thuneitute, a bikin sawrkar laipui inrawlh thuai a, hma la turin an ngen tih a sawi a ni.
Hetihrual hian Mizorama hnam hrang hrang awmte chu MKHC chuan lungmuang taka kan awm ho zel tha a tih tu sawiin, ‘Chi bing leh hnam bing zawnga invauna leh inrikrapna thleng lo tura mipui fimkhur theuh turin kan ngen a. Manipur (Imphal leh a chhehvel) a Mizo awmte pawh thlamuang taka an awm zel theihnan thuneituten hma la ngei turin kan ngen a ni,’ a ti.
He buaina hi a reh thuai theihnan Mizoram mipui leh kohhran zawng zawng Pathian hnena hlan turin an ngen tih a sawi bawk.